Reminishencat e sjelljes apo më saktë të fjalorit komunist, shfaqen heraherës në takimet e Ramës me popullin, siç ka ndodhur tek shfaqjet e shpërndarjes së legalizimave, ku veçon ajo e një plaku me qeleshe nga veriu që thërret: “Rroftë Partia Socialiste me shokun Edi Rama në krye”.
Një e ngjashme ka ndodhur dhe së fundi me të ashtëquajturat “dëgjesa publike” në një parapërgatitje për të “qeverisur me njerëzit”, shpallur nga Rama, i cili këto ditë vape ka zbritur në terren për të mbledhur hallet e njerëzve dhe propozimet përkatëse për zgjidhjen e tyre.
“Të na rrojë partia me ju shoku kryeministër!”, e përfundoi fjalën e tij një banor i fshatit Polis në Librazhd, pasi i parashtroi shefit të qeverisë sy më sy se si duhet zgjidhur çështja e furnizimit me ujë.
Përpos këtyre detajeve, kryeministri Rama është përbetuar sërish se do ndërtojë një administratë model, ku në zyrat e shtetit të ngrihen në këmbë ndaj shtetasit që troket.
Po ashtu, pasi pranoi se në administratën e shtetit ka dhe shumë njerëz që u gjuajnë nevojtarëve me shkop nën emrin e PS-së, Rama i cilësoi partitë e vogla si struktura gjakpirëse. /tesheshi.com/
