Ministrja e Energjisë dhe Transporteve Belinda Balluku, vendosi pezullimin e punimeve të ndërtimit të një HEC-i në kanionin e Holtës në Gramsh, e kjo pas një dëgjese publike ku krah saj ishte minsitri i Mjedisit Blendi Klosi dhe deputeti Taulant Balla.
“Procesi i pezullimit do të vazhdojë me parjen në detaje të të gjithë projektit, me garancitë që nëse i preket një qime floku kësaj bukurie natyrore do të shkohet drejt anulimit”, deklaroi Balla.
Sipas ministres Balluku, komuniteti dhe natyra, janë me interes parësor në çdo sipërmarrje.
“Dua ta them shumë qartë: vërtetë HEC-ët e vegjël kontribuojnë në ekonomi por dhe mund të dëmtojnë ekonomikisht shumë më tepër sesa kontributi i tyre. Nëse për një HEC të vogël i bie vlera një pasurie të madhe natyrore. Ndaj, na duhet një ekuilibër perfekt mes zhvillimit ekonomik dhe mbrojtjes se pasurive tona natyrore, të cilat janë pasuria më e madhe që ne shqiptarët kemi”, tha znj. Balluku.
Ky zhvillim vjen pas reagimit të banorëve të zonës, por dhe mediave, ndaj rrezikimit të një aseti natyror me interes për turizmin, siç është kanioni i Holtës. /tesheshi.com/
