Krahu evropian i Organizatës Botërore të Shëndetësisë (OBSH) të premten paralajmëroi qeveritë në rajon që të mos mbyllin shkollat, pavarësisht rritjes së numrit tw personave të infektuar me COVID në shumë vende.
OBSH vuri në dukje se me afrimin e dimrit, më shumë se gjysma e 53 vendeve që i përkasin Rajonit Evropian të OBSH-së kanë parë një rritje të numrit të personave të infektuar të të gjitha moshave, ndërsa rajoni ka parë një rritje prej 18 për qind të personave të rinj të infektuar.
“Nëse dhe kur vendosen masa për të reduktuar ose kontrolluar infeksionin, shkollat duhet të jenë vendi i fundit për të mbyllur dyert dhe të parat që do t’i hapin ato me masat e duhura parandaluese,” tha OBSH. “Ndërprerja e shkollimit të fëmijëve duhet të jetë zgjidhja e fundit”.
Në vend të mbylljes së institucioneve arsimore, OBSH po propozon një qasje më të gjerë për reduktimin e infektimit në shoqëri.
“Kjo përfshin mjediset shkollore, ku distanca fizike, larja e shpeshtë e duarve, veshja e maskave, një sistem adekuat i ventilimit në klasa dhe akses më i mirë në testim janë të rëndësishme, veçanërisht aty ku ka më shumë fëmijë”, thuhet në deklaratë.
Vitin e kaluar, mbyllja e shkollave pengoi arsimimin e miliona fëmijëve dhe të rinjve dhe bëri më shumë dëm sesa mirë, sipas Hans Henry Kluge, Drejtori Rajonal i OBSH-së për Evropën. “Ne nuk mund të bëjmë të njëjtat gabime përsëri.”
Pandemia e virusit koronal është përshpejtuar në Evropë këtë javë, veçanërisht në vendet në lindje të kontinentit.
Në Evropë, numri i të infektuarve u rrit me 14 për qind këtë javë, dhe situata është duke u përkeqësuar prej një muaji e gjysmë.
Vendet që shënuan rritjen më të madhe të numrit të rasteve në shtatë ditët e fundit në botë janë në Evropë dhe veçanërisht në lindje: Çekia ka rritje më shumë se njëqind për qind, Hungaria 92 për qind, Danimarka 80 për qind, Polonia 70 për qind, Kroacia 65 për qind dhe Sllovakia 63 për qind, shkruan agjencia France Presse.
Jashtë Evropës, situata po përmirësohet në të gjitha rajonet. /tesheshi.com/
