Një kontigjent prej 267 ushtarësh amerikanë zbarkuan në Rinas si pjesë e stërvitjes më të madhe ushtarake “Defender 21” në kuadër të NATO-s.
Shefi i Shtabit Bajram Begaj tha se kjo është një ngjarje historike.
“Është një stërvitje historike një stërvitje që për herë të parë ndodh në Shqipëri. Sot pritëm 267 trupa amerikanë të cilët janë pjesë e kësaj stërvitjeje të madhe.
Është një stërvitje komplekse që përfshin në fushën ajrore, tokësore dhe detare. Sot pjesë e ekipit të forcës tokësore që do të bëhet në Bizë është edhe pjesa e ushtarëve që mbërritën sot.
Është një ngjarje historike, jo vetëm për ushtrinë por edhe për vendin tonë”, theksoi ushtaraku i lartë shqiptar.
Ndërsa ambasadorja Yuri Kim foli për impaktin ekonomik të kësaj stërvitjeje.
“SHBA ka shpenzuar 35 mln dollarë për punësimin e shqiptarëve si shoferë, punëtorë ndërtimi apo kuzhinierë.
Ne do të kemi më shumë se 6000 ushtarë amerikanë këtu, jo të gjithë njëherësh por herë pas herë”, tha ambasadorja. /tesheshi.com/
