Jo vetëm Turqia por e gjithë bota islame i ka sytë sot në Stamboll, te një zhvillim me përmasa historike, i cili padyshim simbolizon dhe rikthimin “osman” të Turqisë si fuqi dhe faktor në zhvillimet botërore.
Ky është rikthimi i Hagia Sophia-s së famshme në xhami, ashtu siç ishte në shekuj, i devijuar më pas në status pas rënies së Perandorisë, duke u shndërruar në muze.
Kjo ka bërë që ky rikthim të përjetohet me emotiviteve të forta fetare ndër muslimanë, kudo që ndodhen. Patjetër dhe në Shqipëri.
Neki Kaloshi, një hoxhë i njohur në Tiranë, i ka dedikuar ca rreshta ngazëllues këtij monenti, duke e parë atë në një rrafsh me të gjerë e më të thellë, në atë të rizgjimit islam.
Shkruar nga Neki Kaloshi
“Me emrin e Allahut, të Gjithëmëshirshmit, Mëshirëbërësit!
Allahu i Lartësuar urdhëron e thotë në Kur’anin Famëlartë: “Xhamitë i përkasin vetëm Allahut, dhe mos iu lut askujt tjetër.”
Sot është një ditë historike për muslimanët në të gjithë botën, për muslimanët e Turqisë në veçanti. Pas 86 vitesh po kthehet në vend amaneti i Muhamed Fatihut! Xhamia Aja Sofia po u kthehet besimtarëve që t’i përkulen në ambientet e saj Krijuesit të Gjithësisë!
Le të shërbejë kjo ditë si një sihariq, si një parathënëse e rikthimit të të gjitha xhamive në Ballkan në funksionin për të cilin janë ndërtuar e rindërtuar! Pra, ku të adhurohet Zoti i Vetëm!
Le të jetë kjo ditë dhe një pikë kthese dhe shprese për mbarë ummetin, për ringritjen e tij, për të lënë pas vuajtjet mbi njëshekullore nga përçarja, padituria, konfliktet vëllavrasëse, nga keqadministrimi dhe pasja mbi kokë e drejtuesve të paaftë, mediokër, aventurierë, ndjekës vetëm të interesave të tyre meskine! Për ringritjen e ummetit madhështor që për shekuj ka kontribuar për përsosurinë e karakterit dhe të moralit njerëzor, për mirëqenien dhe lumturinë e të gjithë njerëzimit!
Aja Sofia u bashkohet pas 86 vitesh heshtjeje simotrave të saj, xhamive madhështore të Stambollit, të Turqisë, e të botës islame, asaj të Fatihut, Sulltanahmetit, Sulejmanies, Selimijes… Aja Sofia bashkohet sot me të dashurit e vet, me besimtarët që e kanë dashur dhe i ka dashur, që e kanë vuajtur me shpirt pamundësinë në dekada për t’iu falur Zotit në të.
Sa mall i madh për këtë bashkim pas 86 vitesh ndarjeje! Dritë e begati pastë për ata që e mundësuan rikthimin e saj në xhami!
O Allah i Lartësuar! Të lutem me tërë qenien time që ezani, namazi, hutbet, vazet, ligjëratat, mësimet fetare, këndimi i Kur’anit dhe këshillat të vazhdojnë në këtë xhami deri në ditën e fundit, në ditën e kiametit! Amin!” /tesheshi.com/
