Stuhia më e fortë në 100 vitet e fundit në Moskë, qindra aksidente me viktima në SHBA për shkak të stuhive të dëborës, trafiku i bllokuar në Japoni, temperaturat e ulëta dhe reshjet e mëdha në Evropë, kjo është pasqyra aktuale e motit në botë.
Shërbimet komunale në Moskë do të duhet të pastrojnë gati 72 milion metra kub dëbore, pas reshjeve më të mëdha të këtij shekulli që goditi këtë qytet gjatë fundjavës, tha nënkryetari Pyotr Birjukov.
Në përgjithësi, lartësia e mbulesës së dëborës në Moskë ka arritur 164 centimetra këtë dimër, edhe gjashtë deri në tetë centimetra më shumë pritet të bie në ditët në vijim. Në Shtetet federale amerikane të Iowa dhe Misuri, kanë ndodhur qindra aksidente rrugore, për shkak të një stuhie dëbore, në të cilën ka pasur vdekje dhe lëndime.
Autoritetet e shtetit Iowa njoftuan sot se shtatë vetë vdiqën në 185 aksidente rrugore për shkak të një stuhie dëbore dhe pesë të shtruar ndodhen në gjendje kritike.
Në të njëjtën kohë, autoritetet e shtetit amerikan të Misurit thanë se pesë vetë u vranë dhe dhjetëra u plagosën në më shumë se 650 përplasje në rrugët e mbuluara me dëborë, njoftoi AP.
Policia e Qarkut në Misuri njoftoi se aksidentet nisën kur dëbora filloi të binte të hënën pasdite ndërkohë që rrugët e lagështa u ngrinë për shkak të temperaturave të ulëta.
Njoftohet se aksidenti më i madh kishte ndodhur në autostradën ndërshtetërore 44 pranë Marsfield, ku 60 dhe 80 automjete u dëmtuan dhe një 55 vjeçar nga Kalifornia humbi jetën. Dëbora sot bllokoi plotësisht trafikun në prefekturën e Fukui në Japoni dhe më shumë se 1,000 automjete mbetën të bllokuara në rrugë, sipas mediave lokale.
Lartësia e borës ka arritur deri 1.3 metra, dhe meteorologët kanë thënë se këto janë reshjet më të mëdha në katër dekadat e fundit në atë vend. Zyrtarët japonezë kanë thënë se kanë kërkuar ndihmën e ushtrisë.
As Europa nuk është kursyer. Sasia e madhe e dëborës ka rënë edhe në veri të Spanjës, ndërsa në Madrid trafiku është vështirësuar dhe shumë rrugë që çojnë në Madrid janë bllokuar. Pas përmbytjes, Parisi u godit nga reshjet e borës, ku si pasojë është lëshuar një paralajmërim, dhe sipas parashikimeve të meteorologjisë, reshjet priten edhe në ditët në vijim.
Meteorologët britanikë parashikojnë se vala e akullt do të godasë Britaninë e Madhe, e cila ndër të moshuarit ka zgjuar kujtimin e periudhave katastrofike që goditën këtë vend në 1978. Trafiku është vështirësuar dhe temperaturat pritet të bien në minus 14 gradë Fahrenheit. /tesheshi.com/
Ndiqni një prej aksidenteve më të tmerrshme zinxhir, ndodhur në Missuri, SHBA
