Diplomacia shqiptare u ballafaqua sot me rastin e rrallë të dëbimit të diplomatëve të huaj, përkatësisht dy rusëve, si reagim ndaj Moskës pas helmimit të ish-spiunit Sergey Skripal në territorin britanik.
Duke folur për TCH, ministri Bushati tha se vendimi u morr pas një koordinimi më NATO-n, porse sigurisht që nuk ka qenë i lehtë.
“Nuk besoj se ka diskutim që ky është një vendim i vështirë. Shqipëria, natyrisht, kur ka ndërmarrë këtë vendim, ka marrë në shqyrtim edhe të gjitha konsekuencat që mund të vijnë nga ky rreshtim në kampin perëndimor dhe mbase nuk është rastësi që sot në Ballkanin Perëndimor kanë ndodhur disa ngjarje, dhe sot për sot kemi rreshtime edhe të vendeve që janë apo që aspirojnë të jenë anëtarë të BE, përkundrejt thirrjeve që kanë ardhur qoftë nga SHBA apo Mbretëria e Bashkuar, për një rreshtim në kampe mbi bazën e disa vlerave të cilat ne i mbrojmë dhe duhet t’i promovojmë”, tha kreu i diplomacisë së Tiranës.
Nga ana tjetër, Bushati është shprehur se nuk është i sigurt nëse Moska do sillet me Tiranën në të njëjtën mënyrë. /tesheshi.com/
