Kuvendi i Shqipërisë do të vijojë nesër seancën me debat mbi qeverinë dhe programin e saj, ndërsa Gramoz Ruçi ka paralajmëruar deputetët se nuk do të falë askënd që do të tentojë të shkelë Rregulloren.
Duket se kryeparlamentari e ka marrë shumë seriozisht detyrën e re, pasi ka lexuar edhe pjesë nga rregullorja ku përcaktohen minutat që ka në dispozicion çdo deputet për të debatuar.
“Dua të kujtoj rregullat. Sipas 48 pika 2 e rregullores, koha e cdo diskutanti është 20 minuta. Asnjë deputet sipas neni 46 pika 2 nuk mund të diskutojë pa iu dhënë leje nga drejtuesi i seancës.
Deputeti i cili kur jepet fjala nga drejtuesi nuk është në parlament, ka hequr dorë nga fjala e tij.
Diksutuesi nuk mund të flasë më shumë se një herë për çështjen. Diskutuesi flet vetëm për thelbin e çështjes”, tha Ruçi.
Kjo është hera e parë në të paktën 20 vjet, që një drejtues parlamenti lexon rregulloren një ditë përpara seancës paraardhëse, çka konfirmon hipotezat deklaratat edhe të kryeministrit Edi Rama se Kuvendi nuk mund të vazhdojë të funknionojë si në legjislaturën e kaluar.
Në fund të seancës së sotme, Ruçi lexoi dhe emrat e deputetëve që kanë depozituar kërkesën për të folur në seancën e nesërme, por kryeparlamentari, ndoshta edhe pa qëllim, ka harruar emrin e ish-kryeministrit. Pak e habitshme që Berisha të mos kishte kërkuar të drejtën e fjalës, gjë që ka sjellë reagimin e deputetëve të opozitës. Lapsusi është korrigjuar menjëherë nga Ruçi që ka pranuar se harroi emrin e deputetit më të vjetër të Kuvendit.
Madje, Berisha, sipas listës së depozituar do të jetë i fundit që do të mbyllë diskutimet, për të kaluar më pas në votimin e qeverisë dhe programit të saj.
Seanca e nesërme parlamentare do të nisë punimet në orën 09:00 dhe nuk dihet sa do të zgjasë, pot ë kihen parasysh se më shumë se gjysma e deputetëve, pa përfshirë këtu anëtarët e qeverisë, do të mbajën diskutime që do të zgjasin nga 20 minuta, gjithmonë nëse zbatohet rregullorja pikë për pikë. Pritet që në këtë seancë të ketë debate, duke iu rikthyer “normalitetit shqiptar”, gjë që ka munguar të seancat e zhvilluara deri më tani. /tesheshi.com/
