Lulzim Basha. Kryetar i PD-së, është përjashtuar nga punimet e seancës parlamentare. Vendimi është marrë nga kryetari i Kuvendit, Gramoz Ruçi, pas dy vërejtjeve dhe një debati të ashpër mes tij dhe Bashës.
Ruçi përjashtoi nga seanca e kësaj të enjte kreun e PD, ndërsa të gjithë deputetët e opozitës kishin zënë aulën parlamentit.
“Nuk do dëshiroja kurrë që masa e parë në parlament ti jepej liderit të opozitës. Atëherë edhe ju bëj apel që të uleni. Zoti Basha! Atëherë në zbatim të nenit 64 dhe 65 si kryetar i kuvendit jap masën e përjashtimit nga seanca plenare të deputetit Lulzim Basha. Zoti Basha mund të dilni dhe të lini sallën e parlamentit! Atëherë 5 minuta pushim derisa zoti Basha të largohet nga parlamenti për bllokimin e foltores”, tha Ruçi, duke ndërprerë punimet e Kuvendit.
Por pavarësisht përjashtimit, Basha nuk ka preferuar të lërë sallën e Kuvendit, çka ka detyruar Ruçin të ndërpresë punimet. Madje ai ka ftuar punonjësit e gardës që të bindin kreun demokrat për të dalë jashtë sallës.
Tensionet në sallën e Kuvendit u ngritën pasi PD kërkoi debat në lidhje me ngritjen e komisionit ad-hoc për reformën zgjedhore. Kreu i PD-së, Lulzim Basha, tha se nuk do të lejonte që opozitës t´i mbyllej goja, duke mos i dhënë të drejtën e fjalës.
Kreu i grupit parlamentar të PD-së, Edmond Spaho propozoi që diskutimi për ngritjen e komisionit të Reformës Zgjedhore të diskutohej sot në orën 16:00, propozimin i cili u hodh në votim dhe u rrëzua me shumicë votash.
Kjo ka sjellë reagime të ashpra nga opozitarët, të cilët tentuan që të bllokojnë fitoren.
“Uluni poshtë që të votojmë kolegë. Uluni poshtë…” ishte thirrja e Ruçit, ndërsa ndërpreu seancën pasi deputetët demokratë zunë foltoren. /tesheshi.com/
