Nga Blendi Gashi
“Pro et contra” deportimit të gjashtë shtetasve turq nga Kosova, janë deklaruar deputetët e Kuvendit të Kosovës.
Kritikat më të mëdha për rastin në fjalë janë adresuar tek presidenti Hashim Thaçi, i cili sipas opozitarëve ka qenë në dijeni për aksionin në fjalë, ndërsa thonë se është shkelur Kushtetuta.
Por ka pasur dhe deputetë të tjerë që kanë thënë se ky rast duhet të hetohet dhe se nuk janë as pro Erdoganit e as por Gylenit, ndërsa kanë përmendur raportimet e disa mediave për aktivitetin e dyshimtë të gjashtë të deportuarve dhe qarkullimet milionëshe të tyre në banka.
Ndërsa ashtu siç pritej, deputetët e komunitetit turk, gjashtë të deportuarit, ashtu si Ankaraja zyrtare i kanë quajtur terroristë.
“Të deklarohet Thaçi…”
Shefi i grupit parlamentar të LDK-së, Avdullah Hoti, ka deklaruar se imazhi i Kosovës si shtet i ri me orientim evropian, ku sundon rendi e ligji, është dëmtuar seriozisht, ndërsa ka bërë fajtor presidentin Thaçi për deportimin e të gjashtëve.
“Ai (presidenti) duhet të deklarohet lidhur me falënderimin që ja bëri presidenti turk, që lë të kuptohet se ai e ka dhënë urdhrin. Ai duhet të bëjë transparente telefonatën me presidentin turk pas deportimit. Është e qartë se Presidenti i ka tejkaluar autorizimet e tij kushtetuese, dhe rrjedhimisht ka shkelur kushtetutën. Pasojat e kësaj shkelje dihen. Dhe kjo sigurisht se nuk do të kalojë pa dhënë përgjegjësi”, deklaroi Hoti.
Shefi i grupit parlamentar të Vetëvendosjes, Gluak Konjufca, ka akuzuar presidentin Thaçin se nuk po tregon të vërtetën.
Sipas tij, Thaçi dhe Erdogani kanë ndërtuar një raport joligjor mes vete që mbështetet mbi konceptin e favorit ndaj njëri-tjetrit.
Kurse deputeti i Grupit të Pavarur të Deputetëve, Dardan Molliqaj, u shpreh i bindur se arrestimi i gylenistëve është një favor që Thaçi po ja kthen Erdoganit.
“Një problem historik në Turqi, ‘Erdoganët’ dhe ‘Gylenistët’ është shëndrru arenë përplasjesh edhe në Kosovë. Hashim Thaçi sipas bindjes tonë i ka shërby Erdoganit për depërtimin e këtyre shtetasve duke u thirrur në një nen ku cenohet territori i Kosovës. Në media po raportohet për qarkullimet bankare. Ku janë shkuar ato pare, për cka janë përdour ato pare. Jam i bindur që Hashim Thaçi i ka bo favor Erdoganit. Po e fut Kosovën në një betejë të padrejtë dhe në interesa të dy grupeve për interesa personale. Ose naj favor që ka marrë të kalumen ose ndonjë tjetër që merr të ardhmen”, ka thën ai.
Në fund, Molliqaj deklaroi se deputetët e grupit të tij nuk janë as me Erdoganin por as me Gylenin.
Edhe deputeti i Vetëvendosjes, Rexhep Selimi, ka drejtuar gishtin te Thaçi si urdhërdhënës për deportimin e gjashtë gylenistëve.
“Në fakt është e vërtetë që Thaçi ka shumë borxhe, se ka bë shumë pazare. Por Thaçi lanë borxhe me kokash njerëzish në këtë vend. Mos u çuditni nëse edhe në të ardhmen e bën një gjë të tillë sepse është i shquar për këtë“, tha Selimi.
Ndërsa deputeti i NISMA-s, Milaim Zeka, ka thënë se përgjegjës kryesor për deportimin e gjashtë gylenistëve është presidenti Hashim Thaçi dhe zv.kryeministri Behgjet Pacolli.
Deputetët e komunitetit turk, pro Erdoganit…
Ndërsa opozita akuzoi Thaçin, drejtuesit e partisë turke AKP në Kosovë, kanë përkrahur aksionin për deportimin e gjashtë gylenistëve.
Mahir Yagcilar, kryetar i Partisë Demokratike turke, njëherit ministër i Ministrisë së Administratës Publike, ka thënë se koha do ta dëshmojë se kush ka gabuar dhe kush ka vepruar drejtë sa i përket ndodhisë së fundit.
“Çdo debat duhet të zhvillohet në fakte dhe argumente. Në çdo shtet roli i inteligjencës është krrucial, procedurat duhet jenë të qarta. Kështu që duhen prezantuar dokumentet faktike sa i përket shtetasve turq. AKI ka vepruar në përputhje me ligjin. Të presim fake dhe pastaj të shohim kush ka vepruar drejt dhe gabuar” ka deklaruar Jagxhilar.
Kurse Firkim Damka, deputet nga Partia Demokratike Turke e Kosovës, ka folur si Ankaraja zyrtare duke thënë se organizata FETO është terroriste dhe se veprimtaria e të deportuarve nba Kosova ishte ilegale.
Sipas tij, ata merreshin me aktivitet ilegale dhe financimi i shkollave të tyre ka qenë komplet ilegal.
“Kanë vepruar në maskën mësimdhënësit, por kanë pasur veprimtari tjera ilegale”, theksoi Damka. /tesheshi.com/
