Përballja më e fundit e kandidatëve republikanë për president të SHBA-ve, e zhvilluar vetëm pak orë më parë, është përqendruar në çështjet e sigurisë kombëtare.
Donald Trump, njëri prej kandidatëve, dhe më i spikaturi deri tani për deklarimet e tij polemizuese, e ka mbrojtur idenë e vet për ndalimin e hyrjes së muslimanëve në SHBA.
“Ne nuk po flasim për izolimin, po flasim për sigurinë. Nuk po flasim për fenë, po flasim për sigurinë. Vendi ynë është jashtë kontrollit,” kanë qenë argumentet e Trump-it.
I ashpër është treguar Jeb Bush, ish-guvernatori i Floridës, duke e quajtur Trump-in një “kandidat kaosi”. Bush-i e ka çmuar si joserioz propozimin për ndalimin e hyrjes së muslimanëve në SHBA, duke e përshkruar kështu kandidaturën e Donald Trump-it, “Ai është një kandidat kaosi, e do të qe një president kaosi.”
Trump-i i është përgjigjur Bush-it në mënyrë cinike: “Ai ka dështuar në fushatën e tij. Ajo është një katastrofë e plotë.”
I ndryshëm ka qenë qëndrimi i dy kandidatëve të tjerë, i senatorit të Teksasit, Ted Cruz-it, dhe i senatorit të Floridës, Marco Rubio-s, që kanë deklaruar se e kuptojnë arsyen se pse e ka paraqitur këtë ide Trump-i, duke e shmangur kritikimin e drejtpërdrejtë të tij.
Në vend të kësaj, të dy ata kanë kritikuar presidentin aktual të SHBA-ve, Barack Obama, duke e akuzuar atë se nuk ia ka dalë t’i mbajë të sigurta Shtetet e Bashkuara. /tesheshi.com/
