Ndërtimi në Parkun e Butrintit, i denoncuar pak ditë më parë, ka shkaktuar debate në Komisionin për Çështjet Sociale, në mbledhjen që po zhvillohet pasditen e sotme. E pranishme në komision ka qenë ministrja e Kulturës, Mirela Kumbaro, e cila duket se është braktisur edhe nga deputetët socialistë.
Alket Hyseni dhe Fidel Ylli, dy ligjvënës të PS-së, janë shprehur të shqetësuar për ndërtimin brenda në parkun kombëtar.
Albana Vokshi, deputete e PD-së dhe kryetare e komisionit, ka kërkuar ndërprerjen e menjëhershme të punimeve, duke i cilësuar si një skandal i vërtetë.
“Kumbaro s’na ka sjellë komunikimin me UNESCO-n. Ndërprisni tani punimet dhe vijojmë dëgjesën për atë që po ndodh në Butrint”, tha Vokshi.
Ndërkohë, Alket Hyseni tha se jo rastësisht ishte ulur nga krahu i opozitës, pasi qytetarët janë të shqetësuar pasi ky ndërtim prek interesin e tyre.
“Problemi është i ndjeshëm edhe për ne. Nëse ka shkelur ligjin nuk ka ku shkon as ministri e askush. Nëse ligji është shkelur unë do jem në krahun e asaj pjese që është për informimin publik”, u shpreh deputeti tjetër i PS-së, Fidel Ylli.
Ministrja Kumbaro ka sqaruar incidentin me një gazetar të televizionit, i cili nuk u lejua nga roja e parkut të Butrintit që të futej në ambientet e zonës arkeologjike. Argumenti i tij qe se kështu i kishte thënë drejtori.
“Është një kompliment shumë i lartë që i bëhet njerëzve të kulturës që debati ngrihet në një nivel të lartë. Dhe që kanë arritur të sjellin në vëmendje edhe gurin më të vogël. Meqënëse më thatë për këtë çështjen e medias, më vjen keq për incidentin që ndodhi dje. Jo vetëm për atë, por për të gjithë gazetarët që kanë të bëjnë me një aspekt filmimi apo fotografimi të pasurive natyrore kanë një detyrim minimal që të marrin leje të autoritetit administrues”, tha Kumbaro.
Debati:
Albana Vokshi: Kumbaro s’na ka sjellë komunikimin me UNESCO-n. Ndërprisni tani punimet dhe vijojmë dëgjesën për atë që po ndodh në Butrint.
Luçiano Boçi: Të ndërprisni menjëherë punimet dhe seancën dëgjimore e zhvillojmë edhe në një mbledhje tjetër, kur ju të jeni gati.
Alket Hyseni: Kjo është një çështje sensitive, prek interesin e qytetarëve.
Vokshi-Kumaros: Nuk lejuat gazetarin e Report Tv të futej në parkun e Butrintit.
Mirela Kumbaro: Ka pasur një incident me gazetarin e Report Tv. Për filmimin dhe fotografimin e pasurive kulturore, të kërkohet leja e autoritetit që e administron. Ne kemi dhënë pafund leje nga BBC, CNN e deri te më të vegjlit.
Albana Vokshi: Gazetari nuk ka pasur kamera. Sot ju duhet t’i kërkonit ndjesë gazetarit dhe medias.
Mirela Kumbaro: A bëjmë një pakt të lutem? Të lëmë njëra-tjetrën të mbarojmë. Unë po të them se njoftimi që erdhi nga Parku është se një ekip që erdhi të filmojë, nuk kishte leje. Pse sot dy ekipe u lejuan? Sepse kishin marrë leje.
Albana Vokshi: Ky është rast i paprecedentë.
Fidel Ylli: Problemi është i ndjeshëm edhe për ne. Nëse ka shkelur ligjin nuk ka ku shkon as ministri e askush. Nëse ligji është shkelur unë do jem në krahun e asaj pjese që është për informimin publik. /tesheshi.com/
