Vijon të thellohet debate mbi funksionimin ose jo të radarëve monitorues në det që janë nën varësinë e Ministrisë së Mbrojtjes.
Debati lindi pasi kreu i Policisë së Shtetit, Haki Çako, përmes një letre informonte ministrin e Brendshëm në detyrë, Dritan Demiraj, mbi dështimet e policisë në luftën ndaj trafikut të drogës, për shkak të mosfunksionimit të radarëve që monitorojnë ujrat shqiptare.
Disa orë pas kësaj letre, Ministria e Mbrojtjes dhe Drejtoria e Kufirit dhe Emigracionit, një strukturë kjo nën varësinë e Haki Çakos, me anë të një deklarate mohuan këto pretendime, madje i cilësuan ato dashakeqëse.
Por sot, një tjetër letër është zbardhur. Ajo që Dritan Demiraj i drejton Mimi Kodhelit, ku e vë në dijeni mbi situatën.
Sikundër raportohet, Demiraj shpreh shqetësimin mbi sistemin e radarëve që ka shfaqur probleme, gjë që ka vështirësuar punën e policisë për kapjen e trafikantëve të drogës.
“Sistemi i radarëve ka shfaqur probleme. Kjo situatë vështirëson punën e policisë. Radarët nuk iu përgjigjen nevojave operacionale, pasi nuk vëzhgojnë të gjithë hapësirën. Krijohen kënde që shfrytëzohen nga trafikantë. Radarët nuk detektojnë mjetet dhe njerëzit. Parametrat e sistemit janë larg atyre që kërkohen. Nuk ka kamera të integrueshme që afrojnë objektet. Duhen marrë masa që të përmirësohen parametrat e sistemit”, shkruan ministri i Brendshëm.
Por dyshimi i ngritur prej tij, përbën një skandal më vete, pasi në letrën drejtuar Kodhelit ai tregon një rast se si radarët janë fikur qëllimisht në mes të operacionit policer.
“Më 7 gusht 2017 morëm informacion për një gomone. Por sinjali i radarit u fik në mes të operacionit . Inxhinieri i kompanisë fiku sinjalin e radarëve. Ka dyshime, se sinjali u fik qëllimisht”, shkruan ai. /tesheshi.com/
