Presidenti Thaçi ka përcjellë qëndrimin e radhës për çështjen e mprehtë të kufijve, kësaj here duke patur në qendër qëndrimet kundërshtuese të kryeministrit Haradinaj.
“Të gjitha shtetet perëndimore, aleatët tanë, garantuesit e paqes dhe sigurisë në Ballkan po bëjnë përpjekje dhe thirrje për paqe, stabilitet dhe arritje të marrëveshjes përfundimtare ndërmjet Kosovës dhe Serbisë. Kjo marrëveshje nënkupton njohje reciproke dhe perspektivë të sigurt të anëtarësimit të Kosovës në BE, NATO dhe OKB. Por, fatkeqësisht, individë të caktuar në vendin tonë, me veprimet e tyre po tentojnë të krijojnë panik dhe konfuzion. Kosova, përkundër kësaj, mbetet e përkushtuar për dialog dhe arritje të marrëveshjes paqësore përfundimtare”, është shprehur kreu i shtetit kosovar.
Dhe më tej, Thaçi ka zgjedhur fjalët për t’ju përgjigjur flakë për flakë Haradinajt, pasi ky i fundit ka përmendur luftën, si kusht për ndryshim kufijsh. Në këtë pikë, Thaçi ka shfaqur dhe një mangësi në formimin gjuhësor. Në vend të fjalës “kosh”, siç e ka kërkuar konteksti i fjalisë, ai ka përdorur fjalën “shportë”.
“Thirrjet për luftë dhe tragjedi të reja në Ballkan i takojnë mentalitetit të shekullit të kaluar dhe si të tilla, meritojnë vetëm të hidhen në shportë”, ka theksuar Thaçi. /tesheshi.com/
