Dy kandidatët për president të SHBA-ve janë përballur në një debat të dytë mes tyre, të përshkuar nga tensioni, fyerjet e kërcënimet.
Mes kandidatit republikan, Donald Trump, dhe kandidates demokrate, Hillary Clinton, nuk ka patur shtrëngim duarsh, duke paralajmëruar minuta të nxehta në podium, që fatkeqësisht nuk kanë munguar.
Me nota të errëta është përcjellë ky debat nga mjetet e informimit.
“Një luftë e pistë,” shkruan CNN në faqen elektronike. “Clinton e Trump lëshojnë fyerje ndërsa bota vështron,” thuhet mes të tjerash në raportimin e CNN-it.
The Guardian e titullon kështu raportin mbi debatin: “Trump kërcënon ta burgosë Clinton-in, ndërsa lufton pisët për ta mbajtur fushatën të gjallë.”
“Hillary Clinton dhe Donald Trump zihen në debatin e dytë,” thuhet në titullin që ka zgjedhur Al Jazeera.
Më e ashpër tregohet Politico: “Debati më i shëmtuar ndonjëherë”.
“Clinton thotë se fushata e Trump-it po shpërthen. Trump-i e quan djall Clinton-in,” është nëntitulli po i Politico-s.
Për të vijuar kështu, “Ishte debati më i shëmtuar në historinë amerikane. Donald Trump dhe Hillary Clinton e quajtën njëri-tjetrin për 90 minuta gënjeshtarë, të pabesueshëm dhe të papërshtatshëm për postin… Trump madje kërcënoi ta burgosë Clinton-in nëse zgjidhet president…”
Trump iu kthye Bill Cinton-it, bashkëshortit të kandidates demokrate, teksa nuk pranoi që t’i ketë sulmuar seksualisht femrat. “Nuk ka patur ndonjë në historinë e politikës që të ketë qenë aq abuziv me femrat,” tha ai në mes të debatit për ish-presidentin.
Kandidati republikan deklaroi se nëse zgjidhej do të urdhëronte hetimin e kundërshtares së tij, e se ajo do të ishte në burg për historinë e postës së saj private elektronike.
“Ka urrejtje të jashtëzakonshme në zemrën e saj,” tha Trump, duke mos u ndalur në furinë e tij.
Clinton, nga ana e saj, do të vinte në dukje komentet e Trump-it mbi femrat, duke thënë se ato “paraqesin saktësisht se kush është ai”.
“Trump u shfaq si më serioz, më i përgatitur dhe më pak i prirur për ta humbur gjakftohtësinë se në debatin e parë presidencial dy javë të shkuara, kur ai u pa si një humbës i qartë,” thotë CNN-i.
“Clinton ishte më pak dominuese se në debatin e parë, e nganjëherë më pak efektive në shmangien e sulmeve të Trump-it në një ndeshje shumë më të hidhur dhe më të akullt se në përplasjen e tyre të parë,” vijon CNN-i, duke dhënë një panoramë të paraqitjes së kandidates demokrate.
Pas dhjetë ditësh do të ketë një debat të tretë mes tyre, që pritet të jetë akoma më i ashpër ndërkohë që zgjedhjet presidenciale në SHBA afrojnë. /tesheshi.com/
