Debatet e forta në Kuvend për dekriminalizimin dhe akuzat e opozitës se shumica po kërkon shkrirjen e komisionit parlamentar për këtë qëllim, duket kanë detyruar ambasadorin amerikan në Tiranë të rinisë turin e vizitave në selitë partiake. Së pari, ai takoi Lulzim Bashën në selinë e PD-së me të cilin foli për dekriminalizimin dhe vijimësinë e procesit, edhe pse nuk bëri komente për mediat në lidhje me zhvillimet e fundit.
Ajo që mund të kuptohet nga deklarimet e kreut të opozitës është se takimi është fokusuar pikërisht në kryerjen me sukses të dekriminalizimit, proces për të cilin ambasadori Lu dhe ambasadorë të tjerë në Tiranë kanë investuar një mbështetje të fuqishme.
“Ne kemi mbështetjen e plotë dhe të gjithanshme të partnerëve ndërkombëtarë të cilët dua t’i falënderoj për nfdihmën që i japin kësaj kauze jetike për Shqipërinë dhe shqiptarët dhe jemi të vendosur që të ndërmarrim të gjithë hapat për ta zgjidhur këtë çështje”, deklaroi Basha.
Opozita kërkon që ligji i dekriminalizimit të miratohet me konsensus brenda komisionit, ndërkohë që janë shtuar zërat se ky komision nuk do të mund të arrijë këtë konsensus të shpresuar.
“Fokusi ynë mbetet zgjidhja institucionale brenda kornizës së marrëveshjes së 24 Dhjetorit, në kuadër të komisionit të dekriminalizimit, për të gjetur rrugën dhe gjuhën e përbashkët në mënyrë që ligji për dekriminalizimin të jetë një ligj efektiv dhe jo një ligj kozmetik”, konfirmoi Basha vullnetin e opozitës për rrugën që duhet të ndjekë procesi.
Prokurori amerikan që mbërriti në Tiranë një ditë më parë e që do të ndihmojë prokurorinë e Krimeve të Rënda ishte në krah të ambasadorit Lu. Duket se qëllimi është ndihmesa e tij në ligjin e dekriminalizimit.
Variantet e opozitës dhe qeverisë për dekriminalizimin e politikës kanë ndryshime që kulmojnë në dy pika, testin e drogës që pretendojnë demokratët dhe marrjen e shenjave të gishtërinjve. Varianti qeveritar nuk i përmban këto dy pika. /tesheshi.com/
