Disponueshmëria e pabarabartë e vaksinës kundër COVID-19 e bën të vështirë dhe ngadalëson shërimin nga pasojat e pandemisë, paralajmëruan eurodeputetët.
Në diskutimin mbi strategjinë globale të Bashkimit Evropian për vaksinimin, deputetët theksuan në seancën plenare në Parlamentin Evropian në Bruksel se vaksina nuk prodhohet dhe shpërndahet në kushte të barabarta për të gjitha vendet.
Duke kritikuar transparencën dhe të drejtën e depërtimit në kontratat e nënshkruara midis BE dhe kompanive farmaceutike, Socialdemokratja (S&D) Kathleen Van Brempt vuri në dukje se “Gjermania është përpjekur të sigurojë doza shtesë të vaksinave përmes negociatave paralele.”
Dyshimet mbi Pfizer
Deputetët nga Italia theksuan se vendit të tyre iu shpërndanë 164,000 doza vaksine më pak javën e kaluar nga sa ishte rënë dakord fillimisht dhe se një qasje e tillë ndikon negativisht në rritjen dhe forcimin e ekonomisë.
“Pfizer përmendi punën në modernizimin e objekteve të prodhimit si arsye për shkeljen e marrëveshjes, por e vërteta është ndoshta krejt e ndryshme. Eshtë e mundur që dozat e munguara janë shitur në vendet jashtë BE-së,” tha Fulvio Martusciello i Partisë Popullore Europiane (EPP).
Shpërndarja e pabarabartë e vaksinave çon në një hendek në zgjerim midis vendeve të zhvilluara dhe atyre të pazhvilluara, tha deputeti gjerman Norbert Neuser (S&D)
“Nëse po flasim tashmë për një strategji në nivelin global, nuk mund të lejojmë që zonat e pasura të marrin vaksina nga njerëzit e varfër,” tha Neuser.
“Një vaksinë për çdo evropian”
Duke komentuar mbi zbatimin e pabarabartë të vaksinimit, deputetja spanjolle Iratxe Garcia Perez (S&D) tha se ishte e nevojshme të tregohej “solidaritet me pjesë të botës si Amerika Latine dhe Afrika”.
Diskutimi u ndoq nga Komisionerja Evropiane për Shëndetin dhe Sigurinë e Ushqimit, Stella Kyriakides dhe Përfaqësuesja e Presidencës së Këshillit, Sekretarja e Shtetit portugez për Çështjet Evropiane, Ana Paula Zacarias.
Zacarias vuri në dukje se falë qasjes së përbashkët evropiane, u sigurua një vaksinë “për çdo evropian”.
BE duhet të përqendrohet tani në një fushatë të shpejtë vaksinimi, por gjithashtu të luftojë “kundër mosbesimit ndaj vaksinave”, tha ajo, duke konkluduar se “transparenca dhe besimi shkojnë dorë për dore”.
BE ka siguruar 2.3 mili ardë doza
Kyriakides tha se BE dëshiron të krijojë një mekanizëm që do ta lejojë atë të ndajë vaksinat e tepërta kundër COVID-19 me vendet fqinje më të varfra dhe Afrikën.
Bashkimi Evropian, i cili ka një popullsi prej rreth 450 milion banorë, tashmë ka siguruar gati 2.3 miliardë doza vaksine nga gjashtë prodhues, shumica e të cilave ende nuk janë miratuar.
Komisioni Evropian pritet të njoftojë së shpejti një komunikim shtesë mbi strategjinë evropiane për virusin COVID-19, ku udhëheqësit dhe qeveritë e BE do të diskutojnë mbi pandeminë gjatë një samiti në 21 janar. /tesheshi.com/
