Nënkryetari demokrat i Kuvendit, Edi Paloka, përmes një komenti në rrjetet sociale, duket se i është kundërvënë kritikëve të Lulzim Bashës në PD.
Duke pasur parasysh ftesën e Bashës për bashkëpunim dhe qëndrimin e mbajtur nga kritikët apo grupimi kundër në partinë më të madhe të opozitës, Paloka shkruan në rrjetet sociale: “kur dikush dorën e shtrirë për bashkëpunim e merr si dobësi, është fatkeqësi, por fatkeqësi për ata vetë që nuk kuptojnë se sa të pavlerë mbeten”.
Reagimi i Palokës ka ardhur dy ditë pas mbledhjes së kryesisë së PD-së, e cila u karakterizua nga debate të ashpra, por edhe idesë së hedhur nga grupimi anti-Basha për krijimin e fraksioneve në partinë më të madhe të opozitës.
Kjo ide është kundërshtuar nga Basha, i cili ka deklaruar se sa kohë ait ë jetë kryetar i PD-së, nuk do të lejohen fraksionet në këtë parti.
Kundër fraksioneve mësohet se janë shprehur edhe ekspertët gjermanë, që do të asistojnë proçesin e ristrukturimit dhe riorganizimit të PD-së, përfshi këtu edhe ndryshimet në statut.
Tashmë pritet të shihet nëse ish-kryeministri Berisha, që ka kundërshtuar fraksionet përsa kohë ishte zyrtarisht në krye të PD-së do të mbështesë apo jo një ide të tillë të artikuluar nga Astrit Patozi. /tesheshi.com/
