Rezistenca në grupin parlamentar të Partisë Demokratike krijon një problem i madh për Lulzim Bashën një ditë para takimit me ambasadorët.
Ish-kreu i Kuvendit, Jozefina Topalli, ish-ministrat e PD-së, por edhe vetë kryeministri Berisha kanë ndalur turravrapin e liderit opozitar, i cili po këndonte “fitore” për heqjen e mandatit të Koço Kokëdhimës.
Siç mësohet, ata i kanë kërkuar Lulzim Bashës që të kushtëzojë menjëherë votën e reformës për drejtësi nen për nen, gjë e cila më pas ka ndodhur, dhe realisht sipas burimeve rrezikon takimin e ambasadorëve.
Ndërkaq, edhe Eduard Selami ka replikuar ashpër ne Bashën, pikërisht një javë pas një takimi në një bar të kryeqytetit me ambasadorin amerikan, Donald Lu.
Vetë Basha, pas mbledhjes së grupit, bëri të ditur kushtin e ri që PD-ja do t’i dërgojë sa më shpejt mazhorancës.
“Grupi ynë finalizoi diskutimet për reformën elektorale. Vendosëm t’i propozojmë komisionit ad hoc për reformën zgjedhore votimin elektronik me shenjat e gishtërinjve, kontrollin e financave të partive dhe kriminalizimin e donacioneve private, përmes financimit 100 për qind nga buxheti i shtetit. Gjithashtu, vendosëm të propozojmë lirinë e medias dhe hapësirën e barabartë mediatike dhe të tjerë parametra europianë për zgjedhje të lira dhe të ndershme”.
Por pikërisht kjo çështje ka shkaktuar përplasje të mëdha brenda PD-së. Siç mësohet, ish-kryetari i PD-së, Eduard Selami e ka akuzuar rëndë Bashën se po vret mendimin e lirë dhe zgjedhjet brenda PD-së.
“Ti flet për reformë zgjedhore, ndërkohë në parti nuk bën zgjedhje të rregullta. Nuk ka asnjë kriter dhe rregulla për këto zgjedhje, por ka vetëm zgjedhje në zonat të cilat kërkohen të mbahen nën kontroll dhe të vendosen influenca”, mësohet se është shprehur Eduard Selami në mbledhjen e grupit të PD-së.
Ky nuk është shpërthimi i parë i Eduard Selamit ndaj Bashës. Disa herë, ai i ka kërkuar Bashës të jetë i kujdesshëm në aksionin e opozitës dhe organizimin brenda strukturave.
Duke përmendur zgjedhjet, Selami i ka kujtuar Bashës disa deklarata të kryetarëve të degëve që e kanë akuzuar kryetarin e PD-së se ka bërë zgjidhje dhe zgjedhje jo demokratike brenda partisë. /tesheshi.com/
