Ndryshimet në ligjin për legalizimet kanë mbërritur në Kuvend. Përfitues të tyre janë rreth 60 mijë qytetarë, që kanë ndërtuar nga viti 2009 deri më 2014-n dhe janë kryesisht, sipas ministres Gjermeni, objekte banimi.
“Sot pritet të miratohet me këto ndryshime ligjore edhe amnistia për ata që kanë ndërtuar pa leje nga janari 2009. Ndryshimet e propozuara i hapin rrugë përfshirjes në legalizim të objekteve pa leje deri në qershor 2014”, deklaroi Gjermeni.
“Këta po përgatisin një skenar më të zi pas kësaj. Ata u thonë qytetarëve, nëse nuk paguani deri në datën kaq, fillon kamata. Dhe nëse nuk paguhet kamata, ju merret edhe shtëpia”, reagoi deputeti i PD-së, Edi Paloka.
Jo vetëm legalizimi, por debati për zgjedhjet gjithashtu shkaktoi replika në Kuvend, ku spikati ai mes Astrit Patozit dhe Ilir Metës, për fenomenin e shit-blerjes së votës.
“Ai spot duhet të ndalet së transmetuari. Është e tepërt, është njësoj sikur ISIS t’i bëjë thirrje botës që të ruhet nga terrorizmi. Kujtoj një shkrim të gazetës ‘Tema’ në vitin 2001. Të më ndjeni për fjalorin, por nuk mund të mos e citoj titullin e atij shkrimi, ‘Pjerdh Iliri nga ODIHRI’. A ia vlen të investohet kaq shumë për një spot? Do të thotë që kemi humbur ndjeshmërinë ndaj kësaj dukurie që po përhapet me ritme të shpejta, me ritmet e LSI-së”, deklaroi Patozi.
“Ai spot nuk ndalet. Ai është për qytetarët që të mos e shesin votën e tyre. Unë nuk kam ç’të bëj pse ju, ato që bëni vetë, ua faturoni të tjerëve, pse qytetarët ju kanë braktisur”, reagoi kryetari i Kuvendit, Ilir Meta.
