Ndërsa seanca e parë gjyqësore ndaj katër aktivistëve të Vetëvendosje-s të dyshuar për sulmin e 4 gushtit të 2016-tës ndaj Kuvendit të Kosovës do të mbahet me datë 25 janar, ligjvënësit kosovarë të enjten në mbrëmje kanë zhvilluar një debat të zjarrtë për arrestimet e tyre dhe për krizën politike që kaploi vendin për disa muaj.
Opozita e ka quajtur proces të montuar politik, gjyqin ndaj aktivistëve, ndërsa kahja e pushtetit ka kujtuar gazin lotësjellës dhe vezët ndaj ministrave.
Kryetari i grupit parlamentar të VV-së, Glauk Konjufca, tha se ekziston një projekt që VV të largohet nga skena politike dhe të shpallet si organizatë terroriste. Sipas tij, prokuroria ka dështuar të argumentojë se këta aktivistët e VV-së janë personat që kanë sulmuar Kuvendin.
“Fornenzika konstaton se kjo nuk ka lidhje më këtë ngjarje. Edhe AND, duke filluar prej flokëve. Asnjeri prej këtyre të identifikuar me antena të PDK-së, nuk figuron se kanë qenë në këto lokacione. … Aktakuza është për t’ia mëvesh, me i mbetur një etiketë që LVV është terroriste. Ka pasur edhe sulme pas kësaj date, policia nuk e ka arrestuar askënd për rastin e RTK-së dhe drejtorit”, tha Konjufca.
Të njëjtin qëndrim shprehu dhe kreu i VV-së, Visar Ymeri.
“Pse është arrestu Astriti. A e di dikush?. Nuk e di askush, dhe po thoni se nuk duhet ta diskutoni këtë çështje. Këta gjashtë të rinj janë terrorizuar nga një grup, që i lidhë policinë, prokurorinë, mediat e kapura, duke i quajtur terrorist prej 29 gusht. Të rinjtë po mbahen në burg pa kurrfarë prove e fakti. Ky proces është i montuar dhe orkestruar dhe është dëshmuar edhe nga vet prokurorët. Po kush është ajo/ato mendje që janë zgjuar ditën e nesërme pas sulmit ndaj objektit dhe ka thënë se, po dihet se kjo është vepër e VV-së dhe e dim kush janë aktivistët. Po i mbani në burg pa kurrfarë provë sepse gjuajtën vezë ndaj minsitrave? Ju po i mbroni një arrestim të tillë por nuk do duhej ta mbronit”, tha Ymeri.
“Drejtësia ta thotë fjalën”
Akuzat e VV-së i mohoi ministri i Brendshëm, Skënder Hyseni, i cili tha se Kuvendi s’duhet të ndërhyjë në drejtësi dhe kategorikisht mohoi të ketë dhënë urdhëra politikë.
“Kurrë s’do të jepja urdhër politik dhe kurrë s’do ta manipuloja qoftë edhe një polic për çështje politike. Jo për dy vjet por edhe po të isha edhe 200 vjet në këtë pozitë s’do të jepja urdhër politik”, tha Hyseni, që ndërkohë përmendi një aksion që aktivistë kanë ndërmarrë ndaj tij gjatë krizës politike.
Ndërsa, zyrtarët e dy partive në pushtet PDK e LDK kanë thënë se çështja e arrestimit të aktivistëve nuk do të duhej të diskutohej nga institucioni ligjvënës por drejtësia duhet ta thotë fjalën e vet.
“Duhet bashkarisht të bëjmë thirrje unike që drejtësia ta kryej punën e pavarur dhe të mësohet se kush ishin aktervt e sulmit të turpshëm mbi Kuvendin”, tha Zenun Pajaziti, kryetar i grupit parlamentar të PDK-së.
“Të lirohen aktivistët”
Kundër dy partive në pushtet dhe në mbështetje të VV-së kanë dalur dy partitë opozitare, AAK e NISMA.
ka thënë se qeveria ka zhvilluar një luftë të ashpër kundër qytetarëve pas kundërshtimit të marrëveshjeve të dëmshme.
“Është e papranueahme të përdoret policia ndaj kundërshtarëve politik. Ligji duhet të jetë i barabartë dhe jo për dikë nënë e dikë njerkë. Kërkoj t’i lironi njerëzit që janë në arrest për veprime politike”, tha Pal Lekaj, kryetar i grupit parlamentar të AAK-së.
Ndërsa Zafir Berisha deputet i NISMA-s tha se në emër të drejtësisë është bërë padrejtësi.
“Përfundimisht organet e drejtësisë të shkapen nga parapolitika dhe nga grupe të caktuara. Se kapja e organeve të drejtësisë është evidente ka dëshmuar edhe afera e përgjimeve. Ndërhyrja në selinë e VV-së është tejet skandaloze dhe na ka rikthy në sisteme moniste dhe totalitare”, ka thënë Berisha.
Ndërkohë, ndërsa mbante fjalim deputetja e VV-së, Albulena Haxhiu, dy kolegët e saj të partisë Driton Çaushi e Fisnik Ismaili, mbajtën një pankartë para ligjvënësve me fotografi të zyrtarëve të shtetit dhe dy gazetarëve, të cilët Haxhiu tha se do do japin përgjegjësi morale edhe penale.
Aty përfshiheshin ministrja e Drejtësisë, Dhurata Hoxha; ministri i MPB-së, Skënder Hyseni; drejtori i policisë, Shpend Maxhuni; drejtori i RTK-së, Mentor Shala; ish-prokurori Sylë Hoxha e të tjerë. Përgatiti: Blendi Gashi – /tesheshi.com/
