Tashmë Tirana zyrtare dhe DEA e kanë vulosur edhe zyrtarisht se të dy palët do të nisin operacione të përbashkëta ndaj narkosve shqiptar.
Pikërisht sot, Ministri i Brendshëm Fatmir Xhafaj ka qenë në selinë qëndrore të Agjencisë Amerikane të antidrogës si dhe në Departamentin e Shtetit për të vendosur nisjen e të ashtuquajturit operacion “gjigand” që pritet të nisë këto ditë.
Bëhet fjalë jo thjesht për një operacion ushtarak, por më shumë hetimor për të gjetur dhe bllokuar paratë e fshehura të baronëve shqiptarë të drogës dhe zyrtarëve të lidhur me krimin.
Xhafaj ka takuar numrin dy të DEA-s dhe njëkohësisht kreun e operacioneve. Bëhet fjalë për Anthony Williams njeriun kryesor që drejton operacionet e mëdha kundër trafiqeve.
Në njoftimin për shtyp të Ministrisë së Brendshme shqiptare theksohet se Xhafaj prezantoi disa nga masat e programuara për të garantuar këtë standard edhe gjatë vitit 2018.
“Ministri u ndal veçanërisht në punën për të sensibilizuar fermerët dhe shoqërinë në tërësi.
Për pasojat negative që vijnë nga kultivimi i kanabisit.
Në vijim, ministri Xhafaj falënderoi DEA-n.
Për bashkëpunimin dhe kërkoi një intensifikim të këtij bashkëpunimi në të ardhme, i cili duhet të fokusohet në shkëmbimin më të shpejtë të informacionit ndërmjet Policisë shqiptare dhe Zyrës Rajonale të DEA-s, në Athinë.
Ministri kërkoi të rritet kapaciteti i kësaj zyre, duke patur një oficer të dedikuar për Shqipërinë apo përmes operacioneve të përbashkëta, mes Policisë shqiptare dhe Zyrës së Athinës”, thuhet në njoftimin e Ministrisë së Brendshme shqiptare.
Zëvendësdrejtori i DEA-s Williams u shpreh në takim se “jemi të gatshëm të rrisim më tej bashkëpunimin mes agjencisë sonë dhe agjencive ligj-zbatuese në Shqipëri”.
Përfaqësues të DEA-s në nivel drejtues operacional, u shprehën të gatshëm për të gjetur mënyrat e duhura.
Për një bashkëpunim më të efektshëm dhe të shpejtë në këtë nivel, sa u përket hetimeve të përbashkëta të trafikut të drogës dhe aseteve kriminale të përftuara nga ky aktivitet, mbështetjen me teknika të zhvilluara, por edhe ndjekjen dhe dokumentimin e veprimtarisë kriminale në këtë fushë.
Në njoftim theksohet se u diskutua lidhur me mbështetjen që DEA mund të ofrojë për identifikimin e rrugëve të pastrimit të parave jashtë territorit të Shqipërisë dhe sigurimin e provave, si dhe zgjerimin e bashkëpunimit për të zhvilluar hetime rreth transaksioneve financiare të këtyre grupeve kriminale apo të personave zyrtarë të lidhur me ta.
Trajnimi i specialistëve të Policisë së Shtetit ishte pjesë e diskutimeve.
Në përfundim, u zhvillua një takim pune i ekipit të Policisë së Shtetit të drejtuar nga Drejtori i Përgjithshëm i Policisë së Shtetit Ardi Veliu dhe drejtuesve të zyrës së Athinës.
Ndërkaq, Xhafaj ka takuar në Uashington edhe zëvendësuesin e Hoyt Brian Ye, pra Matthew Palmer, i ngarkuar me detyrën e zëvendësndihmësit të Sekretarit të Shtetit për Evropën dhe Euro-Azinë.
Siç theksohet në njoftimin zyrtar të Ministrisë së Brendshme: Palmer, vlerësoi aritjet e deritanishme të Ministrisë së Brendshme dhe Policisë së Shtetit, duke shtuar se është shumë e rëndësishme që ky proces reformash, për të cilat Ministria e Brendshme ka një rol kyç, duhet ta çojë vendin drejt hapjes së negociatave me Bashkimin Evropian.
Ai shprehu besimin se reformat kurajoze të ndërmarra në fushën e drejtësisë dhe sigurisë dhe progresi konkret në zbatimin e tyre, janë ndër faktorët kyç që do të shërbejnë si garanci për vendimmarrjen e Komisionit Europian për hapjen e negociatave me Shqipërinë gjatë muajve në vijim.”.
/tesheshi.com/
