Një ekip shtesë i DEA-s amerikane ka mbërritur në Shqipëri prej një jave, qw pas ngjarjes së ndodhur në Ekuador, kur një shqiptar është vrarë sapo do të kryente një takim të rëndësishëm me një nga krerët e karteleve meksikane të kokainës.
Së bashku me specialistët e DEA-s që do të ndjekin një hetim të pavarur nga operacionet e bërthamës së Agjencisë Amerikane kundër Narkotikëve me qendër në Athinë, në Shqipëri ndodhen prej dy vitesh specialistë gjermane të bërthamës antidrogë të policisë.
Ka një marrëveshje mes policisë shqiptare, ku specialistw gjermanë punojnë në Tiranë dhe shqiptarë në Gjermani për të bashkëpunuar e sjellë në terren njohjet dhe psikologjinë e ndërsjelltë të kriminalitetit shqiptar që tregton narkotikë në Gjermani.
Gjithçka e ka rrënjën tek operacioni “Xibraka”, ku u arrit të kapet me prova të plota grupi më i organizuar shqiptar i manifakturimit të kokainës, që ndryshonte rrugë dhe që nuk vinte më direkt nga Amerika Latine, por duke përdorur Qipron greke si ndalesë, ku kokaina industrializohej në veshje apo pajisje manifakture.
Dhe më pas ajo përgatitej për të shkuar në Europë.
Dhe pikërisht këtë operacion, i cili kishte gjasa që të bëhej më i madh se ai i Sokol Koçiut dhe i Durdës në vitin 2001, po e ndjek edhe DEA, pasi këtu është kapur një fill i fortë në Tiranë.
Bëhet fjalë për një grup shumë të madh kriminal, i cili që pas “Xibrakës” ka mbetur jashtë, dhe që prej atëherë politika shqiptare ndodhet në luftë.
Për kujtesë, pikërisht pas “Xibrakës” erdhi dhe furia SHBA-BE për reformën në drejtësi; pasi panë që organet ligjzbatuese shqiptare, në radhë të parë prokuroria, nuk ka ndjekur asnjë dosje të madhe kriminale.
Dhe pikërisht në vitin 2014, ndodhi dhe rezistenca më e madhe e poleve të pushtetit kundër një përpjekjeje për të krijuar një “pol antimafia” në Prokurorinë shqiptare.
Në vitin 2015, u kthyen nga SHBA një grup prokurorësh të drejtuar nga Dritan Rreshka, që u propozuan fillimisht si Task Forca anti-korrupsion, por ky grup nuk mori dekretimin nga Kryetari i KLD-së Bujar Nishani dhe më pas nga vetë Adriatik Llalla që i shpërndau nëpër rrethe, duke u hequr fuqinë e hetimit të krimit të organizuar.
Prokuroria e Krimeve të Rënda dhe Gjykata e Krimeve të Rënda në Shqipëri prej vitit 2015 janë marrë vetëm me hetimet e Durim Bamit, Tom Doshit apo edhe me çështje të ngjashme, por asnjëherë nuk është ndjekur me detaje as lidhjet e ndonjë prej bandave të drogës në vend.
Dhe këtu fillon loja e madhe. U fol me bujë për Klement Balilin, deri edhe një vit më parë. Por për pronarin e Santa Quarantës nuk po flet më asnjeri.
Madje as Greqia nuk po kërkon me ngut arrestin e tij nga autoritetet shqiptare. Pse vallë?
Një burim i tesheshi.com në agjencitë ligjzbatuese në vend, thekson se që prej kalimit të materialit nga ana e Ministrisë së Drejtësisë tek Prokuroria, ende nuk ka një kërkesë nga kjo e fundit për sekuestro prone apo për një hetim mbi origjinën e ardhur të pasurisë.
Kjo është enigmë në vetëvete. Por ç’farë lidhje kanë të gjithë këto argumente mbi trafikun e narkotikëve dhe vizitës së ekipit të DEA-s në Shqipëri?
Lidhja është e qartë. Balili ka qenë pjesë e operacionit të madh para dy vjetësh që u zbulua rruga e trafikut nga Greqia në Itali dhe vendet e Europës Perëndimore.
Pas shpërthimit të çështjes “Balili”, në qytetet kryesore të Europës u arritën të kapen 70 eksponentë të rëndësishëm të mafia-s shqiptare.
Pas këtij operacioni, në Britaninë e Madhe u kap një grup shumë i fuqishëm që kontrollonte trafikun e kokainës që vinte nga Spanja dhe Andverpeni i Belgjikës.
Nuk është rastësi, që të parin takim me ndërkombëtarët, ministri i Brendshëm teknik, Dritan Demiraj ka zhvilluar me ambasadorin britanik në Tiranë, i cili ka kërkuar që të vazhdojë bashkëpunimi mes oficerëve të Scotland Yard-it dhe policisë shqiptare.
Por është fakt që Demiraj, megjithëse me lidhje të forta amerikane, nuk është takuar me Donald Lu-në, të paktën publikisht.
Kjo nuk ka lidhje me personin që drejton ministrinë e Brendshme, por me diapazonin e tij të kompetencave, pasi duke qenë teknik ai nuk kontrollon rrjetin kapilar të policisë. Me Fatmir Xhafën, amerikanët nisën një vetting brenda policisë, i cili duhet thënë që u ndërpre, por që duket se do të rinisë më 26 qershor, kur dhe priten dy superoperacione të mëdha.
Madje më të mëdhatë që kanë ndodhur deri më sot. Dhe ky duket shkakut që të ketë sjellë në Shqipëri ajkën e antinarkotikëve të SHBA-së dhe BE-së. /tesheshi.com/
