Një grup i përbashkët i prokurorëve spanjollë dhe agjentëve të DEA-s kanë mbërritur në Shqipëri.
Pas kapjes së mbi1 ton kokainë në Madrid, ngarkesë e cila pronarët i kishte shqiptarë, drejtësia spanjolle ka kërkuar nga prokuroria shqiptare të nisë menjëherë hetimet për njerëzit e kapur atje; pra për të gjetur rrjetin e Julian Deblinit dhe Dritan Gradicës, pasi mendohet se koka e drogës është këtu. Mësohet se policia shqiptare ka nisur menjëherë hetimet për bashkëpunëtorët e mundshëm.
Aktualisht dihen pak detaje për Julian Deblinin dhe Dritan Gradicën me origjinë nga Hasi dhe Tropoja.
Policia ka nxjerrë nga arkivat se të arrestuarit nuk kanë patur më parë dënime kriminale në Shqipëri apo biznese të regjistruar me emrat e tyre.
“Policia shqiptare ka qenë në dijeni të operacionit pasi oficeri shqiptar i Europol ishte pjesë e operacionit, i cili u koordinua nga policia europianë në bashkëpunim me atë spanjolle dhe DEA-n”, bëri të ditur një oficer i lartë policie që preferoi të mbetet anonim.
Julian Deblini dhe Dritan Gradica u arrestuan në ambientet e jashtme të një hoteli në Madrid nga oficerët e antidrogës spanjolle, ku morën pjesë edhe dy agjentë të DEA-s amerikane.
Hetime janë duke u zhvilluar edhe në Kolumbi të cilat udhëhiqen nga zyra e Prokurorit të Përgjithshëm.
Deblini dhe Gradica kishin mundur të rekrutonin për llogari të tyre zyrtarë dhe punonjës të një aeroporti në Kolumbi.
I gjithë operacioni për arrestimin e këtij grupi kriminal është nga DEA amerikane me pjesëmarrjen edhe të Europol-it.
Ndërhyrja finale për arrestimin e shqiptarëve erdhi në momentin kur ata mbërritën në një hotel në Madrid. Aty u mundësua kapja e 1 ton kokainë dhe 1.5 milion euro, gati për ta transportuar si pagesë për drogën. /tesheshi.com/
