I dërguari i OKB-së për Sirinë, Staffan de Mistura, e ka përjashtuar mundësinë që të ketë zgjedhje në Siri nën regjimin e Bashar Assad-it.
Në një intervistë për Al Arabiya-n, De Mistura ka deklaruar se tranzicioni politik do të jetë një temë kyçe në bisedimet e ardhshme të Gjenevës më 23 mars, vetëm pak kohës pas rinisjes së tyre në të njëjtin vend.
Ndërsa armëpushimi në Siri e ka ulur nivelin e përplasjeve të armatosura në vend, i dërguari i OKB-së është shprehur se kjo do të ketë ndikim në bisedimet e Gjenevës, që, sipas tij, kanë tashmë një axhendë të qartë.
“Nëse ia dalim ta ndalim dhunën në Siri nëpërmjet një armëpushimi të qëndrueshëm, kjo do të na ndihmojë në bisedimet e Gjenevës”, tha mes të tjerash De Mistura në intervistë.
Armëpushimi i ndërmjetësuar nga Rusia e Turqia është respektuar në pjesën më të madhe, e është shoqëruar me bisedimet në kryeqytetin e Kazakistanit, në Astana. Në Gjenevë, bisedimet e ndërmjetësuara nga OKB-ja po zhvillohen mes përfaqësueseve të qeverisë siriane dhe atyre të opozitës. /tesheshi.com/
