Autoritetet gjermane po përpiqen të mbyllin problemet që vijnë me emigrantët nga shtetet, qytetarët e të cilave nuk përfitojnë azil në Gjermani. Kjo do të lehtësonte disi krizën e refugjatëve që ka përfshirë Gjermaninë e cila pret që deri në fund të vitit të marrë 800 mijë aplikime për azil.
Ministri i Brendshëm gjerman, Thomas de Maiziere ka folur në intervistën dhënë kanalit Euronews edhe për çështjen e azilkërkuesve nga Shqipëria.
Ministri deklaroi se ata nuk kanë asnjë arsye për të kërkuar azil, por mund të shkojnë në Gjermani për të punuar.
“Nëse një vend ka aplikuar për anëtarësim në Bashkimin Europian ose vetëm është anëtar i NATO-s, nëse është vend ku respektohet demokracia, atëherë nuk ka asnjë arsye që shtetasit e këtyre vendeve të kërkojnë azil në Europë. Kjo është e papranueshme, në të vërtetë kjo është e dënueshme”, u shpreh ai për “Euronews”.
E pyetur nëse në këtë grup vendesh përfshihet edhe Kosova, De Maiziere ka pohuar:
“Po, Kosovën dhe Shqipërinë gjithashtu. Qeveritë e këtyre vendeve po na kërkojnë që të bëjmë gjithçka që të rinjtë të mos largohen nga vendi në këtë mënyrë. Ne ju themi që të mos vijnë këtu dhe të kërkojnë azil, sepse kjo nuk është për ju, por ju mund të vini këtu për të punuar, mund të vini si emigrantë”, theksoi ministri gjerman. /tesheshi.com/
