Kryetari i Eurogroupit, Jeroen Damlom, tha se Eurozona është e gatshme për t’u përballur me çdo efekt negativ të krizës së borxhit grek, duke shtuar se Greqia duhet të marrë masa për të mbrojtur sistemin e saj financiar, pasi paketës së ndihmave të shpëtimit i vjen fundi të martën e ardhshme.
Evropianët ia kanë mbyllur derën Greqisë për të zgjatur afatin kohor përfundimtar të marrëveshjes së shpëtimit. Kështu, ata e lanë Greqinë të përballet me një defiçit, çka nuk e lejojnë atë të shlyejë borxhin e saj në kohë, gjë që për rrjedhojë çon në një “Grexit”. Kjo pasi qeveria e krahut të majtë ka refuzuar kërkesat e ashpra të kreditorëve, duke thirrur kështu një referendum mbi marrëveshjen e ndihmës.
Ky veprim ngre shumë pyetje, pasi askush në Greqi dhe jashtë saj nuk denjon t`i përgjigjet.
Politika e “paqartësisë së frytshme” e qeverisë Tsipras ka arritur pikun e vet kur ai bëri thirrje për të mbajtur një referendum pas disa muajsh negociatash me kreditorët ndërkombëtarë. Parlamenti grek ka ratifikuar mbrëmë propozimin e referendumit.
Tsipras tha në një fjalim para votimit se ishte i bindur se “populli grek do t`i thotë një ‘’Jo’’ të madhe paralajmërimeve të kreditorëve. Sipas tekstit të propozimit që do të paraqitet përpara votuesit grekë, përgjigja do të shkruhet me “po” ose “jo” rreth pyetjes se i pranojnë ata procedurat e përcaktuara nga kreditorët të premten e kaluar.
Sipas parashikimeve pritet që Greqia ta gjejë veten në javët në vazhdim të ekspozuar përpara goditjeve financiare të njëpasnjëshme.
Pas të martës së ardhshme ajo është e kërcënuar nga rreziku i mospagesës së një kredie prej 1.5 miliard eurosh të Fondit Monetar Ndërkombëtar. Në të njëjtën ditë mbaron edhe ndihma financiare të cilën Athina e gëzon që nga viti 2012.
Shtetet e Eurozonës e kanë hedhur poshtë kërkesën e qeverisë për të shtyrë afatin e planit deri në datën e mbajtjes së referendumit, duke argumentuar se Greqia i ka prerë vet negociatat që ishin në vazhdim, çka sjell për rrjedhojë prerjen e financimit që Banka Qendrore Evropiane u bënte bankave greke.
Qëndrimi brenda ombrellës së planit të ndihmave përbënte aftësi paguese për bankat greke, pasi qasjet për kredi emergjente ata i siguronin nga Banka Qendrore Evropiane.
Po ka akoma dhe një “majë ajzbergu” e cila sapo nga ngritur krye: ajo është humbja e sigurisë së depozitorëve tek bankat greke. Ky efekt domino – siç dihet nga historia – ka çuar në falimentin jo vetëm të bankave të nivelit të dytë, por edhe atyre qendrore qeveritare edhe për rrjedhojë kanë falimentuar edhe vet shtete.
Përgatiti: Enklid Pelari – tesheshi.com
