Trajneri i kombëtares shqiptare, Gianni De Biasi beson se kjo nuk ishte forma më e mirë që mund të tregojnë futbollistët e tij, megjithëse e kupton faktin që ishte një ndeshje vëllezërish, që qëllimin e vetëm të saj e kishte festën.
“Ishte një ndeshje speciale ndaj vëllezërve nga Kosova. Një festë e vërtetë që mbaron këtu, ndërkohë ne duhet të fillojmë të përgatitemi sa më mirë për Kampionatin Europian. Shqipërinë e vërtetë do ta shihni që nga ndeshja me Gjeorgjinë”, theksoi pas ndeshjes De Biasi.
Tekniku i kuqezinjëve, gjithashtu tregoi për vështirësitë që pati për ta përgatitur ndeshjen, pasi festa ishte e pranishme kudo që i shoqëronin futbollistët e tij.
“Atmosfera ishte vërtetë e mirë, por njëherit na pamundësoi për ta përgatitur ndeshjen. Në hotel ishte një rrëmujë e vërtetë, deri sa lojtarët duhet të takoheshin me familjarët e tyre. Edhe terreni i papërshtatshëm ishte një faktor që na e bëri më të vështirë ndeshjen, por duhet kuptuar, ishte një ndeshje speciale”, përfundoi De Biasi.
/tesheshi.com/
