Trajneri i Kombëtares shqiptare, Gianni De Biasi e konsideron ndeshjen me Serbinë një nga më të rëndësishmet e karrierës së tij. Futbolistët duhet të japin 150 për qind në lojë, se më pak nuk mjafton, sipas tij, dhe me “besim e pa u përfshirë shumë”, mund të realizohet objektivi, ai një fitoreje me Serbinë.
Ndeshja që luhet në Elbasan Arena më 8 tetor mund të sjellë kualifikimin historik për Shqipërinë, gjithnjë nëse kjo e fundit fiton dhe nëse Danimarka nuk fiton me Portugalinë.
Mes 26 lojtarëve të grumbulluar, de Biasi konfirmoi pjesëmarrjen e Lorik Canës në ndeshjen ndaj Serbisë ditën e enjte. Synimi i De Biasit është i qartë, fitore në fushë.
“Lojtarët që thirren, thirren sepse jemi të bindur që mund të luajnë. Cana ka patur probleme në periudhën e fundit, më siguruan që po rikuperohet. Kemi lojtarë të rëndësishëm që mund t’i besojmë. Lojtarët që e kuptojnë rolin mes 26 personave. Kam folur qartë me të, e di kush është detyra e tij dhe e të tjerëve. Shpresoj që të bëjmë një ndeshje inteligjente, që mund të nxjerrim atë që kemi nxjerrë në shumë ndeshje të tjera në këtë kualifikim”, tha De Biasi. /tesheshi.com/
