Ka qenë spektakolare vizita e kryeministrit turk Ahmet Davutoglu, në Beograd. Përveç deklaratave për shtyp që kanë synuar rritjen e bashkëpunimit mes dy vendeve, dy kryeministrat kanë përuruar edhe çezmën e Mehmet Pashës, guvernatorit të dikurshëm të Beogradit, që serbët i kanë vënë edhe llagapin “Sokoloviç” që do të thotë Shqiponja.
Davutoglu deklaroi në konferencën për shtyp pas një pyetje që iu bë në lidhje me përplasjen me Rusinë, se Serbia ka marrëdhënie të mira me Rusinë, por që në marrëdhëniet midis Serbisë dhe Turqisë nuk mund të ndikojë asnjë palë e tretë.
“Turqia deri tani ka pasur marrëdhënie të shkëlqyera me Rusinë dhe unë shpresoj se edhe ne mund të kthehemi në ditët e vjetra të marrëdhënieve të mira”, tha Davutoglu.
Ai theksoi se Serbia dhe Turqia janë dy vende dhe dy popuj në të njëjtin rajon.
“Ballkani është si një çorbë, në të cilën ne duam të shtojmë një erëz të mirë për ta bërë atë më të shijshme”, tha Davutoglu.
Kryeministri turk theksoi se marrëdhëniet mes dy vendeve nuk do të ndryshojnë dhe se qëllimi i vizitës së tij në Serbi është shprehje e vullnetit për një përmirësim.
Davutoglu, duke komentuar deklaratën e Vuçiç me rastin e rrëzimit të avionit rus, tha se ai nuk beson se Serbia është një vend i vogël, por mendon se është një vend i madh dhe i rëndësishëm.
“Ne thjesht po mbrojmë hapësirën tonë ajrore”, përsëriti Davutoglu.
Ai tha gjithashtu se Vuçiç në Srebrenicë bëri zgjedhjen e duhur, sidomos kur është fjala për të fshirë kujtimet e këqija nga e kaluara.
Davutoglu dhe Vuçiç vizituan burimin e Mehmed-Pasha Sokoloviç, ku po zbatohet projekti i restaurimit, investitori i të cilit është Agjencia Turke për Zhvillim dhe Bashkëpunim Ndërkombëtar (TIKA).
Të dy kryeministrat, bënë një shëtitje nëpër Kalemegdan, gjatë së cilës biseduan dhe me kalimtarët./tesheshi.com/
