Kryeministri turk Ahmet Davutoglu, do të zhvillojë një vizitë zyrtare në Serbi në ditët e fundit të vitit 2015.
Siç bëjnë të ditur zyra e shtypit e qeverisë, Davutoglu ka planifikuar të shkojë në kryeqytetin serb më 28 dhe 29 dhjetor .
“Vizita zyrtare të cilën Davutoglu do ta realizojë ne Serbi me ftesë të homologut të tij Aleksandar Vuçiç do të zgjasë dy ditë”, thuhet në njoftimin nga Kabineti i kryeministrit turk.
Siç mësohet, Davutoglu, do të bisedojë për marrëdhëniet bilaterale mes dy vendeve në të gjitha aspektet.
Ankaraja ka pasur marrëdhënie normale me Beogradin, edhe pse ka qenë një nga shtetet e para që ka njohur Kosovën. Në zonën e banuar me popullsi myslimane në Sanxhak ka një numër të rëndësishëm të investitorësh turq që veprojnë në industrinë e konfeksioneve dhe në tregti.
Marrëdhëniet ekonomike dhe tregtare ndërmjet Turqisë dhe shteteve që kanë dalë nga Jugosllavia, kanë një traditë të gjatë pozitive.
Diplomacia turke tregohet e kujdeshme të ruajë kontaktet edhe me shtetet me të cilat nuk bie dakord për shumë gjëra thelbësore.
Rast tipik është relacioni me Greqinë, ku edhe pse ka shumë problem, marrëveshjet dhe vizitat e ndërsjellta vazhdojnë normalisht. Ankaraja jep gjithmonë sinjale mirëkuptimi dhe bashkëpunimi me këto shtete. /tesheshi.com/
