Kryeministri turk, Ahmet Davutoglu mirëpriti thirrjet e politikanëve kurdë për t’i dhënë fund konfliktit me partinë e jashtëligjshme PKK, por u kërkoi atyre të japin një përcaktim të qartë se cfarë kuptojnë me armëpushim të mundshëm.
Bashkëkryetari i partisë prokurde HDP, Selahattin Demirtas apeloi PKK-në t’i japë fund konfliktit të armatosur dhe të pranojë armëpushimin ndërsa Qeverisë turke i kërkoi të ndalojë operacionet e fundit kundërterroriste.
“PKK duhet te heqë gishtin nga këmbëza dhe të njoftojë pranimin e një armëpushimi ndërsa qeveria duhet të heqë dorë nga opcioni i operacioneve ushtarake dhe të shprehë gatishmëri për negociata”, tha ai.
Këtij apeli, kryeministri turk, Davutoglu iu përgjigj duke thënë: “Ne nuk kemi qenë kurrë mbështetës të konfliktit apo dhunës, por nëse ata mendojnë se do të qëndrojmë të heshtur ndërsa ata ngrenë kurthe e vrasin policët e ushtarët tanë, unë e deklaroj këtu se të gjithë ata që prishin rendin publik do të ndëshkohen pa mëdyshje”.
Për t’i dhënë fund konfliktit, tha Davutoglu, PKK duhet të shpërbëjë celulat urbane që bëjnë presion mbi komunitetet lokale në lindje.
Duke iu adresuar politikanëve kurdë, ai tha se negociatat për paqe duhet të zhvillohen përmes parlamentit turk.
Kryeministri i bëri këto komente gjatë një fjalimi në provincën Sanliurfa ku një sulm nga Shteti Islamik në 20 Korrik, vrau 33 persona. /tesheshi.com/
