Turqia nuk planifikon të dërgojë trupa tokësore në Siri për të luftuar Shtetin Islamik, njoftoi kryeministri i vendit. Ahmet Davutoglu tha se sulmet ajrore ndaj pozicioneve të IS në afërsi të kufirit shtetëror mes Turqisë dhe Sirisë dhe ndaj separatistëve kurdë të PKK-së në Irak mund “të ndryshojnë lojën”.
Këto sulme vijnë në përgjigje të dhunës së javës së kaluar në Turqi, ku u vranë 32 aktivistë në një shpërthim në Suruc.
Situata do të diskutohet edhe në një takim urgjent të NATO-s të martën, thirrur nga Ankaraja.
Davutoglu tha në një takim me drejtuesit e gazetave, mbajtur pas veprimeve ushtarake turke, se tashmë ekzistojnë rrethana të reja në konfliktin rajonal.
“Prania e një Turqie që mund të përdorë efektivisht forcën e saj mund të sjellë pasoja që mund ta ndryshojnë lojën në Siri, Irak dhe në të gjithë rajonin, gjithkush duhet ta kuptojë këtë”, citoi gazeta Hurriyet kryeministrin. /tesheshi/
