Kryeministri turk i ka dërguar paralajmërime të qarta Bashkimit Europian se, nëse nuk e përmbush premtimin për lëvizjen e lirë, pa viza, të qytetarëve turq nga qershori i këtij viti, kanë për t’u anuluar të gjitha marrëveshjet mbi krizën e refugjatëve.
“Turqia është një dialogues serioz. Ajo bën çfarë ka premtuar, e nuk do të lejojë asnjë lëshim në zbatimin e asaj çka i është premtuar,” do t’u thoshte Davutogllu gazetarëve në orët e vona të së hënës në aeroportin e Ankarasë.
Një marrëveshje e shumëpërfolur në mes të marsit mes BE-së dhe Turqisë synon ta reduktojë vërshimin e refugjatëve drejt Europës. Turqia është zotuar të shtojë kontrollet e të pranojë të gjithë refugjatët që mbërrijnë në brigjet greke, duke marrë në këmbim nga BE-ja mes të tjerash premtimin për lëvizjen e lirë të qytetarëve turq më së voni në qershor.
“Ky është një angazhim reciprok. Nëse BE-ja nuk ndërmerr hapat e nevojshme të kërkuara për këtë, atëherë, sigurisht, nuk mund të pritet nga Turqia që t’i ndërmarrë këto hapa,” ka qenë paralajmërimi i shefit të qeverisë turke.
“Kam besimin se në qershor do të kemi heqjen e vizave. Në të kundërt, askush nuk duhet të presë që Turqia t’u përmbahet angazhimeve të veta.”
Në të njëjtën linjë ka qenë dhe ministri i Jashtëm turk, Mevlut Çavushogllu, që më herët është shprehur thuajse me fjalë të njëjta, “Po qe se BE-ja nuk e mban fjalën, duke përfshirë marrëveshjen për refugjatët, ne do t’i anulojmë të gjitha marrëveshjet.” /tesheshi.com/
