Të gjendur në Bruksel në takimin për refugjatët, kryeministrat e Turqisë dhe të Greqisë, Ahmet Davutogllu dhe Aleksis Cipras, janë takuar kokë më kokë dhe kanë qenë në një mendje për një thellim të bashkëpunimit midis dy vendeve.
Bisedimet mes dy kryeministrave kanë qenë tejet të ngrohta, dhe kanë rezultuar me lajmërimin e një takimi të nivelit të lartë të bashkëpunimit që do mbahet shkurtin e ardhshëm në Izmir të Turqisë.
“Nuk do të diskutojmë vetëm projektet e përbashkëta, por gjithashtu çështjet dhe interesat e përbashkëta,” theksoi Davutogllu duke iu referuar takimit të pritshëm.
Drejtuesit e qeverisë turke dhe greke u zotuan të punojnë së bashku për t’i dhënë zgjidhje krizës së refugjatëve në rajonet e Egjeut dhe Mesdheut.
Në këtë frymë, kryeministri turk e çmoi si me rëndësi të jashtëzakonshme për sjelljen e stabilitetit bashkëpunimin midis dy vendeve në lidhje me çështjen e refugjatëve.
I të njëjtit mendim qe dhe Cipras, “Bashkëpunimi ynë për të dobësuar valën e emigracionit dhe për të zvogëluar vërshimet e jorefugjatëve është jetik për rajonin tonë, për Europën, dhe për marrëdhëniet mes Turqisë dhe BE-së.”
Që marrëdhëniet midis Turqisë dhe Greqisë janë në rrugë të mbarë e bëri të qartë Davutogllu, kur tha se, “Axhenda afatgjate për Turqinë dhe Greqinë është miqësia, vetëdija për fatin e përbashkët dhe shikimi drejt së ardhmes.” /tesheshi.com/
