Kryeministri turk ka mbajtur dje fjalën e përjavshme para deputetëve të partisë së tij, AKP-së. Një vend të posaçëm në fjalën e vet kanë zënë aktet e fundit terroriste në Ankara e Stamboll, por edhe ato të djeshmet në Bruksel.
Ahmet Davutogllu i ka dënuar sulmet e djeshme në Bruksel, duke u ofruar belgëve ngushëllimet e tij e duke bërë thirrje për qëndresë ndaj terrorizmit:
“U ofroj ngushëllimet e mia qeverisë dhe popullit të Belgjikës, dhe dëshiroj të shpreh solidaritetin në emër të popullit tonë. E ftoj të gjithnjë njerëzinë të qëndrojë e bashkuar kundër terrorit global dhe çdo lloj terrorizmi.”
Ai ka folur dhe për një aleancë të së keqes në Turqi, duke iu referuar sulmeve të njëpasnjëshme në Ankara e Stamboll, që kanë marrë dhjetëra jetë njerëzish.
“Ka një plan tradhtar pas sulmeve të fundit terroriste. Ka një aleancë të së keqes, të përbërë nga disa media, nga bota akademike, nga politikanë dhe aktorë ndërkombëtarë, në mbështetje të këtyre akteve kundër Turqisë,” ka deklaruar Davutogllu para grupit parlamentar të Partisë për Drejtësi dhe Zhvillim.
“Boshtet e së keqes që kërkojnë ta fusin Turqinë në një rreth dhune dhe paqëndrueshmërie i bëjnë bashkë këto grupe terroriste dhe i mobilizojnë gjithashtu elementët e tyre civilë.”
Kryetari i qeverisë turke nuk ka lënë pa përmendur gjatë fjalimit dhe sjelljen e ndryshme ndërkombëtare ndaj akteve terroriste kur bëhet fjalë për vendin e tij. Grupet terroriste i kryejnë sulmet në Turqi, sipas Davutogllusë, duke e ditur se do të mbështeten nga media ndërkombëtare, e njohur për qëndrimin armiqësor kundër Turqisë.
“Kur një sulm terrorist ngjet në Belgjikë apo Francë, ka ndjeshmëri në median ndërkombëtare. Por kur një sulm ngjet në Turqi, qeveria jonë kritikohet më shumë se terroristët.”
“Kjo është një luftë për mëvetësinë dhe të ardhmen tonë,” ka kujtuar Ahmet Davutogllu. /tesheshi.com/
