Udhëheqësit politikë nga Kina, Japonia, Gjermania dhe ekonomitë e tjera të mëdha do të marrin pjesë në Forumin Ekonomik Botëror javën e ardhshme, për herë të parë në internet, në vend të vendpushimit dimëror zviceran të Davos-it, thanë organizatorët e ngjarjes.
Përveç presidentit kinez Xi Jinping, kryeministrit japonez Yoshihide Suga dhe kancelares gjermane Angela Merkel, në takim do të marrin pjesë liderë të tillë si kryeministri indian Narendra Modi, presidenti francez Emmanuel Macron dhe presidenti i Afrikës së Jugut Cyril Ramaphosa.
Pandemia e virusit corona këtë vit ka detyruar organizatorët të mbajnë ngjarjen në internet dhe ajo do të hapet të hënën e ardhshme nga sekretari i përgjithshëm i Kombeve të Bashkuara Antonio Guterres.
Në fjalën e tij, portugezi do të theksojë nevojën për multilateralizëm në një botë të polarizuar, tha Forumi Ekonomik Botëror.
Më shumë se 1.000 udhëheqës të korporatave
Joe Biden, presidenti i zgjedhur amerikan, i cili do të marrë detyrën të mërkurën, planifikon të rrëzojë disa nga vendimet e njëanshme të paraardhësit të tij Donald Trump, të tillë si ai për largimin nga Marrëveshja e Klimës në Paris.
Ish-Sekretari i Shtetit i SHBA John Kerry, i cili do të marrë pjesë në Forum si i dërguari i Biden-it për çështjet e klimës, do të drejtojë takimin.
Më shumë se 1.000 udhëheqës të korporatave do të marrin pjesë në veprimtarinë pesë-ditore, slogani i të cilit është “Një vit kyç për rivendosjen e besimit”.
“Besimi kërkon përparim në trajtimin e të gjitha sfidave me të cilat përballemi,” tha themeluesi i Forumit Klaus Schwab, duke përmendur ndryshimin e klimës, pabarazinë sociale dhe krizën e bashkëpunimit global.
Përveç takimit në internet, një takim fizik duhet të mbahet në Singapor në maj. /tesheshi.com/
