Agjencia britanike e lajmeve Reuters bën të ditur se David Schwendiman është emëruar kreu i Prokurorisë Speciale të Kosovës.
Reuters u referohet burimeve pranë Task Forcës së Bashkimit Europian për hetimet në Kosovë.
Dhe këtë fakt tesheshi.com e ka publikuar fiks një vit më parë, përkatësisht më 9 gusht 2015.
Po kush është njeriu që do t’i hetojë komandantët e UÇK-së dhe të ashtuquajturat argumente të dosjes Dick Marty?
Është amerikan, por edhe një njohës mjaft i mirë i krimeve të ndodhura në ish-Jugosllavi. Bëhet fjalë për një “zanatçi” të dorës së parë. Ai është David Schwendiman, që pritet të nisë punë në fund të shtatorit.
David Schwendiman është një amerikan nga Utah, ku ka nisur karrierën akademike dhe ligjore si pedagog e më pas si avokat. Schwendiman është një nga pedagogët më të njohur jo vetëm të Universitetit të Utahit, por edhe të shumë universiteteve të SHBA-ve.
Mban gradën “profesor doktor” në jurisprudencë. Ai ka punuar në hetimin e krimeve të luftës në shumë zona të botës. Është në një nivel të lartë mendimi dhe gjykimi. Kur u emërua në krye të Task Forcës së BE-së për hetimin e të ashtuquajturave krime të UÇK-së, deklaroi se, “kemi rastin të nxjerrim të vërtetën mbi akuzat e raportit të Dick Marty-t”.
Përpara se të emërohej në Kosovë, prokurori Schwendiman ka shërbyer në Afganistan si përfaqësues i Inspektorit të Përgjithshëm për rindërtimin e Afganistanit.
Në vitin 2001 ai shërbeu si atashe ligjor i ambasadës së SHBA-ve për çështjet ligjore në Kabul. Por ajo që e bën të afërt me rastin e Kosovës është fakti se zoti Schwendiman ka shërbyer në vitet 2006-2009 si prokuror ndërkombëtar në Departamentin Special për Krimet e Luftës që ndodhej në Prokurorinë e Përgjithshme të Bosnjë-Hercegovinës.
Në këtë rol ai hetoi krimet e kryera në konfliktin që zgjati nga viti 1992-1995.
Nga 2007-a ai ishte një nga katër zëvendësprokurorët e përgjithshëm të Bosnjë-Hercegovinës, dhe i dërguari i Departamentit të Shtetit për Krimet e Luftës.
Schwendiman përfaqësoi Prokurorin e Përgjithshëm të SHBA-ve në tre Lojëra Olimpike, ku siguria ka rëndësi parësore, në Sidnej 2000, në Salt Lake në 2002-shin dhe në Athinë në 2004-ën.
Ai ka përfaqësuar Departamentin e Drejtësisë në disa çështje në Bahrejn, Vietnam, Tajlandë dhe Bangladesh. Karrierën e ka nisur natyrisht si prokuror në shtetin Utah, ku ka shërbyer edhe si zëvendësprokuror.
Nga viti 1977 deri në vitin 1987, Schwendiman ka shërbyer edhe si avokat në Marinën e SHBA-ve, ku ka marrë edhe gradën leitnant komandant. /tesheshi.com/
