Dy vite liri me kusht dhe 100.000 dollarë gjobë është vendimi që dha dje gjykata për David Petraeus-in, ish-shefin e CIA-s, i cili akuzohej për dhënie të materialeve sekrete jetëshkrueses së tij. Petraeus i shpëtoi burgut, por duhet të paguajë një gjobë shumë më të madhe nga ç’kishin kërkuar prokurorët federalë.
Karriera e gjeneralit pati marrë një goditje rrënimtare pasi u zbulua një lidhje jashtëmartesore me biografen e tij, Paula Broadwell, së cilës i kishte dhënë informacion sekret për librin që ajo kishte në dorë, “All In: The Education of General David Petraeus”. Ish-shefi i CIA-s u detyrua të japë dorëheqjen në vitin 2012, pasi lidhja e tij jashtëmartesore u bë publike.
Petraeus arriti një marrëveshje muajin e shkuar me prokurorët federalë, ku pranonte se qe fajtor.
Ai do të lejohet të udhëtojë jashtë kufijve të vendit të tij, dhe nuk do t’u nënshtrohet testeve të drogës apo kufizimeve për armë zjarri.
Disa prokurorë dhe zyrtarë të FBI-së qenë shprehur se Petraeus-i duhej të dënohej me burg për dhënie të informacioneve sekrete Broadwell-it mbi përvojën e tij në Afganistan, por gjykata në Charlotte e pa të arsyeshme të japë një vendim më të butë.
Mes materialeve sekrete ishin emrat e operativëve të fshehtë, strategjia e luftës e koalicionit, si dhe shënimet mbi diskutimet e Petraeus-it me presidentin Obama dhe me Këshillin Kombëtar të Sigurisë. /tesheshi.com/
