“Do të nevojiten dekada për Turqinë që të futet në BE dhe me këtë ritëm, mundet që kjo do të ndodhë në vitin 3000” – kështu i është përgjigjur kryeministri britanik, David Cameron lëvizjes Vote Leave, e cila ka paralajmëruar se Turqia për pesë vite do të futet në Union dhe do të fundosë Britaninë e Madhe me emigrantë të rinj.
Lëvizja Vote Leave (Voto për të dalje) do të fillojë të hënën fushatën me mesazhin “Turqia (76 milion banorë) i bashkangjitet BE-së. Voto Dalje, merre kontrollin”.
“Britania do të jetë e pafuqishme të ndalojë hyrjen e Turqisë dhe lirinë e lëvizjes së qytetarëve të saj, thotë lëvizja në fjalë, por Cameron hedh poshtë këtë mundësi”, shkruan agjencia DPA.
“Nevojiten dekada të tëra për këtë. Turqia e ka dorëzuar kandidaturën e saj në vitin1987. Nëse gjërat ecin me ritmin e deritanishëm, duhet pritur deri në vitin 3000 që Turqia të hyjë në bashkimin Evropian”, tha Cameron për ITV.
“Dymbëdhjetë milion turq thonë se dëshirojnë të vijnë në Britani të Madhe dhe shumica prej tyre janë kryesisht të papunë dhe studentë”, njofton Sunday Express, e afërt me partinë antiemigracion UKIP, shkruan agjencia AFP.
“Zërat për të mbetur në BE, janë zëra që ju lejojnë njerëzve nga Shqipëria, Maqedonia, Mali i Zi, Serbia dhe Turqia të lëvizin lirshëm në vendin tonë në momentin kur vendet e tyre të anëtarësohen në Bashkimin Evropian. Shumë prej vendeve të tyre kanë nivel të lartë të kriminalitetit, probleme me banda dhe celula terroriste”, ka thënë Sekretarja Shtetërore në forcat e armatosura, Penny Mordaunt, njëra prej ministreve në qeverinë e Cameronit e cila është pro Brexit-it.
Duke u përgjigjur në pyetjen e BBC të dielën, Mordaunt tha se “është shumë e mundshme që Turqia të hyjë në BE brenda tetë viteve të ardhshme, dhe Britania e Madhe nuk do të ketë mundësi fare të rezistojë për një gjë të tillë”. /tesheshi.com/
