Kath Phipps, 85 vjeçe, e cila ka punuar për United në role të ndryshme për 56 vjet, ka vdekur të enjten, njoftoi klubi në një deklaratë të përzemërt duke e nderuar gruan që përshkruhej si një “figurë e kudogjendur” në klubin anglez.
Siç u zbulua në The Athletic, në javët para vdekjes së saj, një numër i paparë njerëzish nga “familja e saj Manchester United” mbërritën në derë për ta përshëndetur për herë të fundit. Infermieret që kujdeseshin për të komentuan se ata “kurrë nuk kishin njohur dikë pa familjen e ngushtë që të kishte kaq shumë vizitorë”.
Phipps filloi të punojë në United si operatori i parë i centralit të klubit në vitin 1968 gjatë mbretërimit të Sir Matt Busby. Në maj 2022, pas më shumë se pesë dekadash shërbimi, asaj iu dha çmimi për shërbimin ndaj futbollit.
David Beckham dhe Ryan Giggs thuhet se janë ndër ish-yjet e Manchester United që vizituan Kath Phipps para vdekjes së saj. Beckham, i cili fluturoi nga SHBA për të parë Phipps, e cilësoi atë si “rrahjet e zemrës së Manchester United” dhe tha se “Old Trafford nuk do të jetë kurrë më i njëjti pa buzëqeshjen tuaj” në një homazh emocionues.
Beckham shkroi një mesazh emocionues në Instagram këtë javë dhe e shoqëroi postimin e tij me një foto të tij duke mbajtur dorën e Phipps pranë shtratit të saj.
“Përgjithmonë në zemrat tona… Fytyra e parë dhe e fundit që do të shihja gjithmonë ishte Keth e ulur në Old Trafford duke pritur të më jepte biletat e mia të lojës”, shkroi ish-ylli i Djajve të Kuq. “Ajo ishte zemra e Manchester United, të gjithë e dinin se kush ishte Kath dhe të gjithë e adhuronin atë”.
“Unë u transferova në Manchester kur isha 15 vjeç dhe Kath i premtoi mamasë dhe babait tim: ‘Unë do të kujdesem për djalin tuaj për ju, mos u shqetësoni’, dhe nga ajo ditë e parë deri në ditën e fundit që kalova me të, ishte pikërisht ajo, ‘pa të cilën Old Trafford nuk do të jetë kurrë më i njëjti pa buzëqeshjen tuaj ndërsa ne ecim nëpër ato dyer… Ne ju duam’.” /tesheshi.com/
