Kreu i një prej dy gjysmave të PD-së, Lulzim Basha, posedues i siglës zyrtare, po e shndërron në kryefjalë mbështetjen ndaj SPAK-ut.
I janë vërsulur SPAK-ut, kur në fakt është hera e parë në 33 vite që të fuqishmit përballen me drejtësinë. Se ligji deri tani në këtë vend ka qenë vetëm për fukarain, këta shkojnë në burg për lidhje telash, ndërsa ata që vjedhin qindra miliona dhe asete publike, shëtisin restoranteve luksoze jashtë shtetit. Kjo nuk është Shqipëria për të cilën u ngrit rinia dhe u themelua PD 34 vite më parë”, tha Basha gjatë një takimi me demokratë të degës 12 në Tiranë.
Basha tha se “barazia para ligjit nuk mund të fillojë pa i dhënë fund pandëshkueshmërisë dhe të fortëve që nuk i prekte dikur ligji”.
“Detyra jonë politike është të qëndrojmë në krah të drejtësisë dhe SPAK-ut. Asgjë s’është perfekte, por është hera e parë që një institucion ka kurajon dhe profesionalizmin dhe mbështetjen ndërkombëtare për të bërë atë që ishte e pamundur, për të vënë të fuqishmit para drejtësisë. Ndaj ka dhe do të ketë mbështetjen politike të Partisë Demokratike të Shqipërisë”, theksoi Basha.
Por duhet kujtuar se vetë ai, edhe pse e ka nisur karrierën politike me hetime, apo ndryshe procese gjyqësore, si ajo për abuzime të përfolura me Rrugën e Kombit, së cilës ai iu shmang me procedurë, apo më vonë hetimet mbi donacione me bazë ruse të qarkulluara në PD, nga SPAK nuk është hetuar apo përfolur për hetime mbi ndonjë çështje të caktuar, ku më e mundshmja do ishte, nëse ndodh, ajo për vrasjet e 21 Janarit.
Sinqeriteti në “dashurinë e papërmbajtshme” të Bashës për SPAK do testohej nëse dhe ai do përfundonte një ditë i thirrur në zyrat e kësaj strukture ankthsjelljëse. /tesheshi.com/
