Një çift amerikan Tom Clark, 96 vjeç dhe gruaja e tij 92 vjeçare Arnisteen, janë të martuar prej 68 vitesh. Gjatë jetës së tyre në çift ata janë ndarë vetëm gjatë luftës në Kore, kur Tom u bë pjesë e ushtrisë.
Për këtë arsye, çifti i moshuar, kur u shtruan që të dy në repartin e kirurgjisë ortopedike në Piedmont Fayette Hospital, në shtetin e Georgia (SHBA), ndarjen e tyre nuk e përjetuan mirë.
Për ta ishin përgatitur dy dhoma të ndara. Por për shkak të traumës së pësuar, spitali i theu rregullat, duke i bashkuar të dy në një dhomë. Siç thuhet në faqen në Facebook të spitalit, Tom dhe Arnisteen u sistemuan në krevate pranë njëri tjetrit, për të shmangur problemet lidhur me largësinë.
Pas vitesh të tëra të kaluara bashkë, një ndarje e papritur në moshën 90 vjeçare i rëndoi psikologjikisht, kështu që edhe në spital ata qëndrojnë pranë njeri tjetrit. “Nuk mund të rri dot larg saj, është gruaja më e bukur në botë”, tha Tom i kënaqur pas bashkimit./tesheshi.com/
