Dashamir Shehi ishte pjesë e qeverisjes së parë të Partisë Demokratike në vitin 1992, dhe sot vazhdon të militojë në radhët e koalicionit opozitar me partinë e tij Lëvizja për Zhvillim Kombëtar. I ftuar në një bisedë të hapur në Forumet UET me studentë dhe pedagogë, ai foli mbi temën: “E djathta dhe zgjedhjet e Qershorit”.
Shehi tha se opozita e djathtë i ka të gjitha mundësitë për t’i fituar zgjedhjet, por foli me rezerva për lidershipin e ri të saj, Lulzim Bashën, kryesisht për raportet me paraadhësin e tij, Sali Berishën. Sipas tij, janë disa hapa që Basha duhet të ndërmarrë për ta bërë të mundur fitoren: të ketë një ekip të ri dhe të prodhojë një projeksion politik të tij, e ta tërheqë karrocën e PD-së pa Berishën, por jo domosdoshmërisht t’i dalë kundër.
“Berisha, si të gjithë njerëzit e zotë, ka një gravitet të vetin. Ka një masë e cila bie mbi gravitet, dhe sigurisht përreth Berishës për vite me rradhë kanë lëvizur njerëz, ide dhe interesa. Unë gjykoj se si një grafik i cili ka një ngjitje, ka një rënie dhe mbaron. Ka një cikël të caktuar në politikë; unë gjykoj se zoti Basha mund ta bëjë këtë punë, ta tërheqë karrocën e PD-së edhe pa Berishën, jo domosdoshmërisht kundër Berishës pasi nuk e quaj të vlefshme sepse Berisha ka akoma një inerci politike, ka shumë njerëz pas vetes, të cilët kanë dhënë kontribut për PD-në dhe duhet t’i sjellin votat pranë opozitës.
Por Basha duhet t’i japë një markë të vetën. Tashmë u bënë tre vite dhe këto janë zgjedhjet e para politike, dhe nëse nuk hyn me modelin tënd, me idetë e tua apo qoftë me fytyra të reja, them se nuk ka sjellë ndonjë rinovim. Ky nuk është një eksperiment politik, por është linja normale.
Grekët e lashtë kanë thënë një fjalë të bukur, ’Kush shikon mbrapa, mbrapa shkon’, pra, për të ecur para duhet të shikosh përpara. Nga kjo pikëpamje, zoti Basha i ka të gjitha mundësitë, arsimimin e duhur, eksperiencën e mjaftueshme në politikë, moshën, dhe është më i riu i ne të vjetërve dhe është më i vjetri i atyre të rinjve që kanë ardhur nga bashkia e Tiranës; besoj se dhe për hir të rrethanave dhe fatit të tij, sigurisht dhe zotësisë, ka patur një shanc që jo të gjithë e kanë pasur. Të xhirosh të gjithë ekzekutivin, përfshirë dhe bashkinë e Tiranës, dhe të mbërrish në krye të PD-së, unë them se e ka bërë gazetën e vetë politike dhe tani ka ardhur dita që në zgjedhje të marrë vendimet e duhura. Për mua, vendimet e duhura janë këto: ne duhet t’u afrohemi shqiptarëve jo si e djathta ideologjike e vjetër, jo si e djathta antikomuniste, por si një e djathtë esenca e së cilës është të bëjë shtet. Nëse ne sot jemi të dobët, s’kemi shtet të fortë duke diskutuar sot për gjykatat, për Kushtetutën, ne u ofrojmë shqipatrëve shtet që bën ligjin e barabartë për të gjithë njerëzit. Nga kjo fillon historia e të djathtës. Dhe e dyta, brenda këtij shteti do keni mundësi të punoni që të gjithë; e treta, ky shtet me qeverinë e vet ekzekutive që do të dalë, do të jetë faktor promovues i ekonomisë, që të kemi më shumë punë.”
Shehi shprehu rezerva për ecurinë e tranzicionit shqiptar, për nivelin e përfaqësimit politik në Kuvend dhe për mënyrën se si punon qeverisja e sotme e majtë. /tesheshi.com/
