Departamenti Amerikan i Shtetit, në raportin për të drejtat e njeriut për Kosovën për vitin 2015, vlerëson se korrupsioni endemik qeveritar dhe i sektorit privat si dhe mungesa e ndëshkimit të akteve korruptive mbetet një problem i rëndësishëm i të drejtave të njeriut.
Një nga problemet më serioze sipas raportit, është edhe pengimi, herë-herë i dhunshëm, i Kuvendit nga deputetët opozitarë në periudhën tetor-dhjetor.
Problemet e tjera, sipas raportit, përfshijnë keqtrajtimin e raportuar të të burgosurve, frikësimin e mediave nga zyrtarët publikë dhe elementet kriminale dhe dhunën kundër personave të zhvendosur që kanë kërkuar të kthehen në shtëpitë e tyre.
Pas raportit të DASH kanë reaguar partitë opozitare në Kosovë. Aleanca për Ardhmërinë e Kosovës, përmes një kumtese dërguar mediave ka thënë se vlerësimi i DASH është shqetësues, duke shtuar se edhe një herë u vlerësua, se qeveria aktuale siç e quan kjo parti e korruptuar, po shkel të drejtat e njeriut.
Aleanca e Ramush Haradinajt thotë se është e përkushtuar që të zhbëjë korrupsionin në Kosovë, duke vendosur mekanizma institucional të specializuar për të luftuar këtë kancer në qeverinë e Kosovës.
“Aleanca, me programin e saj, synon të themelojë Byron Nacionale të Hetimeve, e cila do të jetë mekanizëm i sistemit të drejtësisë penale të Republikës së Kosovës, i vendosur te Zyra e Prokurorit të Përgjithshëm dhe të jetë i specializuar për të hetuar krimet; do të ketë homologun e vet në Departamentin e Hetimeve në Policinë e Kosovës, që do të ketë emër të ngjashëm – Policia BNH; si dhe në sistemin gjyqësor – Departamenti Gjyqësor për Rastet Penale nën Juridiksionin e BNH-së. BNH do të jetë përgjegjëse për luftimin e terrorizmit, krimit të organizuar dhe korrupsionit në nivel të lartë”, thuhet në kumtesë.
Më tej kjo parti opozitare thekson se korrupsioni endemik qeveritar është edhe një arsye e rëndësishme për protestën masive të 14 majit 2016, e cila do të mbahet në Prishtinë, duke filluar në orën 14:00. /tesheshi.com/
