Zhbërja e Speciales nga Kuvendi i Kosovës, do ishte një vendim i pamatur. Kështu ka vlerësuar analisti i njohur amerikan, Daniel Serwer, gjatë një interviste dhënë në VOA.
“Kosova është një vend sovran, është një demokraci dhe anëtarët e Parlamentit mund të ngrenë çdo çështje që dëshirojnë. Por kjo nuk do të thotë se do të ishte veprim i mençur ngritja e çështjeve të tilla”, tha Serwer.
“Le ta themi hapur: arsyeja që gjendemi përpara kësaj situate janë të metat e sistemit gjyqësor në Kosovë. Kjo gjykatë nuk do të ekzistonte, nëse Kosova do të kishte bërë atë që duhej bërë për të vendosur sundimin e ligjit”, theksoi analisti i njohur. Sipas tij, pas inisiativës për zhbërjen e Speciales janë individë që përpiqen t’i shpëtojnë përgjegjësisë dhe nuk duan që Ushtria Çlirimtare e Kosovës të ndotet nga akuzat për veprime të jashtëligjshme.
“Por siç e shikoj unë, do të ishte shumë më keq, që individë të caktuar të mos vihen para përgjegjësisë për veprime të tilla, gjë që do të përlyente krejt emrin e kësaj organizate”, thekson Serwer. /tesheshi.com/
