Vetëm 31 vjeç është Daniel Agger, e emri i tij kishte filluar të qarkullonte mes një sërë skuadrave europiane që ishin të interesuara për shërbimet e tij. Por ish-mbrojtësi i Liverpulit ka befasuar kur ka deklaruar se nuk do të luajë më futboll. Dëmtimet e njëpasnjëshme kanë patur rolin e tyre në vendimin e lojtarit.
“Faleminderit për mbështetjen tuaj. Një përvojë e madhe. Eshtë pikëlluese, por është vendimi i drejtë që të ndaloj. Jam krenar për karrierën time,” ka shkruar Agger në Twitter.
Ai do ta fillonte dhe ta mbyllte aktivitetin futbollistik me Brondbin, por kulmin e karrierës do ta kishte me Liverpulin.
Në tetë vite të qëndrimit të tij te skuadra angleze, ai do të luante në 232 takime dhe do të shënonte 14 gola. Krisja do të ndodhte kur Liverpuli nisi të drejtohej nga Brendan Rodgers, që filloi ta linte në stol danezin.
Agger do të kthehej te Brondbi dy vite më parë. Në sezonin e fundit u aktivizua në 26 ndeshje, e shënoi një gol.
Debutimin me kombëtaren e Danimarkës do ta bënte në qershor të vitit 2005. 75 herë doli ai në fushë me bluzën e danezëve, duke shënuar dhe 12 gola, megjithëse një mbrojtës. /tesheshi.com/
