Pasi qëndroi për vite të tëra te Barcelona, mbrojtësi brazilian u zhvendos sezonin e shkuar në futbollin italian, për të luajtur për kampionët e Juventusit.
Vetëm një sezon më pas, edhe pse është 34 vjeç, Dani Alves është shumë pranë transferimit në futbollin anglez, ku pritet të luajë për Mançester Sitin.
Për Alves-in qe një paraqitje e shkëlqyer te Juventusi, me gjashtë gola të shënuar dhe shtatë asiste në 33 ndeshje zyrtare, duke e ndihmuar “Zonjën e vjetër” të fitonte Serinë A, Kupën e Italisë, e të arrinte në finalen e Champions League-s.
Mjete të ndryshme informimi, spanjolle, italiane dhe angleze, bëjnë të ditur se tanimë mbrojtësi brazilian ka gjetur gjuhën e përbashkët me Mançester Sitin për transferimin, e se shpejt do t’i bashkohet Guardiola-s, trajnerit që e pati dhe te Barcelona.
Gjithçka tani sillet rreth shumës së transferimit, sipas këtyre burimeve mediatike.
Sugjerohet se Dani Alves ka kërkuar një kontratë më të gjatë nga Juventusi, me aktualen që i mbaron në 2018-s, por torinezët nuk kanë qenë të gatshëm t’ia plotësojnë kërkesën. /tesheshi.com/
