Deputeti socialist Pandeli Majko, njëherësh ministër për Diasporën, propozoi ndryshime kushtetuese me qëllim për të penguar precedentin PD-LSI më dalje nga sistemi.
“Ka ardhur koha për të diskutuar ndryshimin e Kushtetutës, ku mes të tjerash të jetë edhe parashikimi se kush braktis sistemin duhet të paguajë edhe me ekzistencën elektorale. Kush mendon se politika është për të fituar, kufizon veten nga frika e humbjes”, tha Majko.
Ai ftoi opozitën që të kthehet në sistem, e t’ja nisë me pjesëmarrjen e Reformës në Drejtësi.
“PD duhet të kthehet në sistem, ky proces do vazhdojë me Reformën Zgjedhore. Ka rëndësi për ndryshime cilësore në sistemin zgjedhor e duke mos u fokusuar vetëm në detaje teknike”, tha Majko. /tesheshi.com/
