Në vazhdën e sulmeve të shumta terroriste të kryera dhe të inspiruara nga ISIS, ka pasur një rritje shqetësuese të islamofobisë; kandidati presidencial për president të SHBA-ve Donald Trump madje ka bërë thirrje për “mbyllje totale dhe të plotë” të hyrjes për muslimanët në Amerikë. Por sigurisht, të njehsosh Islamin me terrorizmin është një veprim sa i pabazuar aq i paarsyeshëm. Kjo ishte fryma që përshkoi një fjalim të kryebudistit Dalai Lama mbajtur në Parlamentin Europian, kur prej tij u cek situata e sigurisë botërore.
Në fakt, sipas Dalai Lamës, autorët e akteve të tilla të dhunshme nuk janë fare muslimanë. Ai argumentoi se sulmet terroriste të kryera në Francë janë në kundërshtim me Islamin.
“‘Musliman terrorist!’ Ky formulim është i gabuar”, tha ai.
“Çdo person i cili dëshiron të përfshihet në dhunë nuk është budist apo musliman i vërtetë, ngase mësimet islame na mësojnë se momentin që një herë jeni përfshirë në gjakderdhje, në të vërtetë ju nuk jeni praktikues i vërtetë i Islamit”, tha Dalai Lama.
“Të gjitha traditat e mëdha fetare bartin të njëjtin mesazh: atë të dashurisë, dhembshurisë, faljes, tolerancës, vetëdisiplinës”, vazhdoi ai.
Vërejtjet e Dalai Lama-së vijnë pak ditë pas kremtimit të Kurban Bajramit dhe 15-vjetori i sulmeve terroriste të 11 shtatorit.
“Ndarja e fundamentalizmit nga Islami është vendimtar për integrimin dhe shuarjen e dhunës”, tha ai duke sugjeruar gjetjen e një gjuhe të përbashkët: “Në këtë nivel mund të ndërtojmë harmoninë e vërtetë, në bazë të respektit reciprok, të mësuarit reciprok, admirimit reciprok, etj”, përfundoi fjalimin e tij Dalai Lama. /tesheshi.com/
